«Astana LRT» qoǵamdyq kólik tarıfiniń qymbattaý sebebin túsindirdi
ASTANA. QazAqparat - «Astana LRT» Basqarma tóraǵasy Bekmyrza Igenberdınov qoǵamdyq kólikte jolaqy tóleýdegi ózgerister men tarıftiń qymbattaý sebebi jaıynda málimet berdi, dep habarlaıdy QazAqparat tilshisi.
2018 jyldyń 10 shildesinde «Astana aqshamy», «Vechernıaıa Astana» gazetterinde jáne Astana ákimdigi saıtynda «Astana qalasy boıynsha qalalyq jáne qala mańy qatynastarynda jolaýshylar men bagajdy turaqty avtomobıl kóligimen tasymaldaý tarıfteriniń keıbir máseleleri týraly» Astana ákimdiginiń Qaýlysy jarııalanǵan bolatyn.
Brıfıng barysynda «Astana LRT» JShS Basqarma tóraǵasy Bekmyrza Igenberdınov «saralanǵan tarıfti engizýdegi maqsat - qoǵamdyq kólik salasyndaǵy kóleńkeli aqsha aınalymyn túp tamyrymen joıý, bıýdjetke túsimderdi molaıtý, qalanyń kólik júıesin odan ári damytýǵa kóbirek qarajat bólý» ekenin aıtyp ótti.
Bul rette tarıfter mynadaı mólsherde belgilendi:
Qolma qol aqshasyz tóleý kezinde (kólik kartasy arqyly):
daǵdyly qalalyq baǵyttarda - 90 teńge
ekspress qalalyq baǵyttarda - 180 teńge
qala mańy baǵyttarynda - 1 km úshin 8 teńge.
Aqshalaı tóleý kezinde:
daǵdyly qalalyq baǵyttarda - 180 teńge
ekspress qalalyq baǵyttarda - 250 teńge
qala mańy baǵyttarynda - 1 km úshin 11,5 teńge.
Sonymen qatar, qaýlyǵa sáıkes, jol aqysyn tóleýdiń elektrondyq júıesi istemeı qalǵan jaǵdaıda, jol aqysyn kólik kartasymen tóleıtin jolaýshynyń tegin júrýge qaqysy bar.
Endi kólik kartasyn paıdalanatyn jolaýshylardyń alǵashqy valıdatsııa jasaǵan sátten bastap 60 mınýt ishinde 1 (bir) ret tegin aýysyp otyrý múmkindigi bolady. Buryn tegin aýysyp otyrý sanyna shek qoıylmaıtyn.
Sondaı-aq, «Astana LRT» basshylyǵy saralanǵan tarıf engizilgenge deıin paıdalanýshylarǵa kólik kartalaryn satyp alý men toltyrýdyń qoljetimdiligin túsindirý jumystary júrgizilgenin atap ótti.
Eske sala keteıik, Astanadaǵy qoǵamdyq kólik jolaqysynyń 2018 jyldyń 21 shildesinen bastap qymbattaıtynyn osyǵan deıin jazǵan bolatynbyz.
