«Astana LRT» qoǵamdyq kólik qozǵalysyna qatysty túsken shaǵymǵa jaýap berdi
NUR-SULTAN. QazAqparat – «Astana LRT» kompanııasy qoǵamdyq kólik qozǵalysyna qatysty túsken shaǵymǵa jaýap berdi, dep habarlaıdy QazAqparat tilshisi.
Aıta ketsek, qaladaǵy qoǵamdyq kólikterge jaýapty «Astana LRT» kompanııasy tańerteńnen beri turǵyndardy eskertip, qala mańyna shyqpaı tura turýǵa keńes bergen edi.
«Qurmetti qala turǵyndary men meımandary!. Múmkindik bolsa, qala shetine shyǵýdy shegere turyp, asa qajettilik bolmasa úıden shyqpaǵandaryńyz jón. Eger júrgizýshi bolsańyz, jaqsylyq jasap, adamdardy úılerine jetkizip tastańyz. Qazir qaladaǵy qoǵamdyq kólikterdiń qozǵalysy qıyndap tur. Aýa raıynyń qolaısyzdyǵyna baılanysty (joldardy qar basqan) qalalyq baǵdarlar ýaqytsha keıbir aıaldamalarǵa kirmeıdi. Baǵdarlardyń ózgertilgen syzbalarymen sýretterdi kórip tanysa alasyzdar», - dep eskertti kompanııadan.
Elordanyń qoǵamdyq kóligine qatysty jańalyqtardy Astana LRT Facebook jáne Instagram paraqshalarynan jáne www.alrt.kz saıtynan bilýge bolady.
Dese de, qoǵamdyq kólikke jaýapty kompanııanyń jumysyna qatysty áleýmettik jelide áli de shaǵymdar túsip jatyr.
«Astana LRT, nelikten borandy kúnde Prıgorodnyı aýylyna júretin Ekspress 100 avtobýsy toqtap qalǵan. Adamdar boranda tońyp tur. Eshkim avtobýstyń jolǵa shyqpaıtynyn bilmeı qalǵan. Nelikten eskertilmegen?» - dep jazady Irına Semıbratova atty azamat.
Bul shaǵymǵa «Astana LRT» kompanııasy jaýap berdi.
«Aýa raıynyń qolaısyzdyǵyna baılanysty №10 jáne №12 avtobýstar ýaqytsha Prıgorodnyı aýylyna kirmedi. Biraq, qazir olar shtattyq rejimde jumys istep tur», - delingen kompanııanyń jaýabynda.
Kompanııanyń baspasóz hatshysy Naýat Azanbaevanyń habarlaýynsha, qazir qala mańyna qatynaıtyn 21 qoǵamdyq kóliktiń bári ýaqytsha toqtap qalǵan.
