Astana LRT: Qoǵamdyq kólik baǵasy kóterilmeıdi, tek saralanady
ASTANA. QazAqparat - 21 shildeden bastap Astananyń qoǵamdyq kólikterinde jańa saralanǵan tarıf júıesi kúshine enedi, dep habarlaıdy QazAqparat tilshisi.
Buryn aıtylǵandaı Astana ákimdigi ústimizdegi jyldyń 21 shildesinen bastap qalalyq qoǵamdyq kólikterdiń jańa tarıf júıesine kóshetinin habarlady.
Saralanǵan jańa júıege kóshýde aldymen kólik kartalarynyń satylymy artqan. Sońǵy eki kún ishinde 16 500 kólik kartasy satyldy. Jyl basynda kólik kartasyn qoldanýshylar 5 % bolsa, qazirde 50% asty.
«Bizdiń baılanys ortalyǵymyzǵa, resmı saıtymyzǵa, áleýmettik jelilerimiz arqyly tarıftiń ózgerýine qatysty kóp suraqtar kelip jatyr. Alaıda alańdaýǵa sebep joq. Kólik kartasymen tóleý kezinde qalalyq qoǵamdyq kólikte júrý quny burynǵy qalpynda qalady, ıaǵnı eresekter úshin 90 teńge, 7-15 jastaǵy jasóspirimder úshin 40 teńge», -dedi Astana LRT Basqarma tóraǵasy Bekmyrza Igenberdınov.
Kólik kartasyn satyp alý úshin qala boıynsha 6 mamandandyrylǵan kassa, 30 RTVM-avtomattary, 51 saýda oryndary jumys isteıdi. Al kólik kartasyn Qiwi- termınal, kaspi.kz ınternet-bankıng, Astana LRT kompanııasynyń www.transcard.kz saıty arqyly onlaın toltyrý qoljetimdi bolady.
Sonymen qatar erteńnen bastap kondýktor qyzmeti joıylady. Búgindi tańda jumys istep júrgen kondýktorlar jol aqysyn elektrondyq tóleý júıesiniń jumysy boıynsha keńesshi bolady.
Sondaı-aq, basqarma tóraǵasy jolaýshylardy otyrǵyzý men túsirý erejesiniń de ózgeretinine toqtaldy.
«Osy ereje engizilmesten buryn halyqaralyq tájirıbe zertteldi. Kóptegen iri megapolısterde avtobýsqa tek aldyńǵy esikten kiredi áne jolaýshylar kólik kartasymen kire sala tólem jasaýy tıis», - dedi ol.
Óz kezeginde Kóliktik baqylaý departamendi Astana ІІD Jergilikti polıtsııa qyzmetimen birge, qala avtobýstaryna tekserý júrgizedi. Sońǵy eki kúndegi tekseristiń nátıjesinde 34 jolaýshyǵa, 163 540 teńge kóleminde aıyppul salynǵan.
