Astana LRT isi: Talǵat Ardan men Qanat Sultanbekov 7 jylǵa sottaldy
«Qanat Sultanbekov Qylmystyq kodekstiń 189-babynyń 2-tarmaǵy jáne 28-baptyń 3-bóligine sáıkes kináli dep tanylsyn. Memlekettik salada qyzmet atqarý quqyǵynan ómir boıyna aıyra otyryp, 7 jylǵa bas bostandyǵynan aıyrý jazasy taǵaıyndalsyn. Jazasyn qaýipsizdik deńgeıi ortasha deńgeıdegi qylmystyq-atqarý júıesi mekemesinde ótesin», - dedi sýdıa Vıktorııa Semenova úkimdi oqı otyryp.
Aıta ketsek, T.Ardan men Q. Sultanbekovke qatysty úkim syrttaı shyǵaryldy.
Sýdıa onyń sebebin eki sottalýshynyń da Qazaqstannan tys jerde ekenin jáne sotqa kelýden jaltarýymen baılanystyrdy.
«Talǵat Ardan Qylmystyq kodekstiń 189-baby 4-bóliginiń 2-tarmaǵy boıynsha kináli dep tanylsyn. Aıyptyny memlekettik salada qyzmet atqarý quqyǵynan ómir boıyna aıyra otyryp, 7 jylǵa bas bostandyǵynan aıyrý jazasy taǵaıyndalsyn. Jazasyn qaýipsizdik deńgeıi ortasha qylmystyq-atqarý júıesi mekemesinde ótesin», - dedi sýdıa.
Eske sala ketsek, ótken jyly Sybaılas jemqorlyqqa qarsy is-qımyl agenttiginiń 1-shi departamentiniń asa mańyzdy ister jónindegi tergeýshisi Danııar Bekaıdarov «Astana LRT» kompanııasy boıynsha is sotqa joldanǵanyn habarlaǵan edi.
Keıinirek osy is boıynsha alǵashqy sot otyrysy qashan ótetini belgili boldy.
Aıta ketsek, Memleket basshysy Qasym-Jomart Toqaev LRT isi boıynsha jaýapty adamdar baqylaýshy organdardyń suraǵyna jaýap berýi kerektigin eskertken bolatyn.
Sondaı-aq Prezıdent byltyr kúzde LRT qurylysyn jedeldetýdi jáne oǵan qatysty isti tergeýdi tapsyrǵan bolatyn.
Artynsha ótken jyldyń qańtar aıynda Sybaılas jemqorlyqqa qarsy is-qımyl agentiginiń ekinshi departamentiniń basshysy Sergeı Perov elordada LRT qurylysyn salý barysynda qarajat urlaý qylmystyq isin tergeý sharalary aıaqtalǵanyn málim etken edi.
