«Astana LRT» isi: Qarajat jymqyrý shemasy anyqtaldy
NUR-SULTAN. QazAqparat – «Astana LRT» isi boıynsha birqatar jalǵan kásiporyn tergelip jatyr. Bul týraly elordadaǵy brıfıngte QR Sybaılas jemqorlyqqa qarsy is-qımyl agenttigi ekinshi departamentiniń basshysy Sergeı Perov aıtty, dep habarlaıdy QazAqparat tilshisi.
«Tergeýde bári anyqtalatyn bolady. Jalǵan kásiporyndarmen LRT merdigerlik uıymdary baılanysty bolǵan. Tergeýge baılanysty olardyń qansha bolǵanyn naqty aıta almaımyz. Ýaqyty kelgende sizderge barlyǵyn habarlaıtyn bolamyz», - dedi Sergeı Perov jýrnalısterdiń suraqtaryna jaýap berip.
Ol jalǵan kásiporyndar arqyly jobaǵa bólingen qarajattyń jymqyrylǵanyn aıtyp ótti.
Sondaı-aq, Perov kompanııanyń qashyp júrgen burynǵy basshysyna qatysty pikir bildirdi.
«Ony halyqaralyq jeli, memleketaralyq izdeý jelisi boıynsha izdep jatyrmyz. Tergeý jymqyrý faktisi boıynsha bastalǵan. Kúdikti izdeýde», - dedi Sergeı Perov.
Eske salsaq, Prezıdent LRT qurylysyn jedeldetýdi jáne oǵan qatysty isti tergeýdi tapsyrdy.
Buǵan deıin LRT-nyń qurylysy ýaqytsha toqtatylǵany týraly habarlaǵan bolatynbyz. Oǵan qatysty Úkimet basshysy Asqar Mamın pikir bildirdi.
