«Astana LRT» isi: Birneshe tulǵaǵa qatysty qylmystyq is sotqa joldandy
«R. M. Amanjolov jáne basqa da tulǵalarǵa qatysty qylmystyq is Nur-Sultan qalasynyń qylmystyq ister jónindegi mamandandyrylǵan aýdanaralyq sotynyń is júrgizýine qabyldandy», - delingen elorda sotynyń baspasóz qyzmeti taratqan habarlamada.
Atalǵan qylmystyq iske qatysty aldyn ala tyńdaý 2022 jylǵy 24 tamyz saǵat 10:00-ǵa belgilengen.
Eske salsaq, elordadaǵy LRT-nyń qurylysy 2019 jyly sáýirde toqtatylǵan edi.
2020 jyldyń qańtarynda LRT qurylysyna qatysty isti tergeý sharalary aıaqtaldy.
Sol jyly qazanda «Astana LRT» kompanııasy boıynsha is sot qaraýyna joldandy.
Sondaı-aq, bıyl 13 tamyzda Nur-Sultan qalasynyń prokýratýrasy elorda ákiminiń burynǵy orynbasary Qanat Sultanbekov pen «Astana LRT» JShS Basqarma tóraǵasy Talǵat Ardanǵa qatysty qylmystyq isti sotqa joldanǵany týraly habarlady.
Aıta ketsek, Memleket basshysy Qasym-Jomart Toqaev bıyl 11 qańtarda ótken Májilis otyrysynda elordadaǵy LRT qurylysy týraly pikir bildirgen edi.
«Kópshilikti, ásirese elorda turǵyndaryn ashýlandyratyn taǵy bir másele – LRT qurylysy bolyp otyr. Ol kádimgi ınfraqurylymdyq jobadan eldiń abyroı-bedeline nuqsan keltiretin kúrdeli problemaǵa aınaldy. Qazirdiń ózinde orasan zor qarajat jumsaldy, qaryzdar tartyldy, sheteldik áriptester aldynda aýqymdy kelisimsharttyq mindettemeler qabyldandy. Bul joba bastapqyda-aq úlken qatelik boldy, ony moıyndaý kerek. Sonymen qatar, bul sybaılas jemqorlyqtyń ıisi múńkip turǵan joba», - degen edi Prezıdent.