«Astana LRT» basshysy: kondýktorlar jumyssyz qalmaıdy
ASTANA. QazAqparat - Astana LRT Basqarma tóraǵasy qoǵamdyq kólikte keleshekte kondýktorlar bolmaıdy degen BAQ aqparatyna túsinikteme berdi, dep habarlaıdy QazAqparat tilshisi.
Avtobýs jolaqysy úshin jańa tarıftiń engizilýi týraly baspasóz konferentsııasynda «Astana LRT» JShS basqarma tóraǵasy Bekmyrza Igenberdınov jańa júıeniń engizilýimen qatar kondýktorlardyń qyzmetine de qatysty pikir bildirdi.
Onyń aıtýynsha, kondýktorlardyń bir bóligi qoǵamdyq kólik salasynda jumysyn jalǵastyra beredi.
«Biz buryn da aıtqanbyz, qazir de qaıtalaımyz, kásibı sheberligin kórsete bilgen kondýktorlar Kóliktik baqylaý departamentine jumysqa shaqyryldy, departament qoǵamdyq kólik salasyndaǵy buzýshylyqtardy anyqtap, joıýdy júzege asyrady. Sonymen qatar, kondýktorlardyń bir bóligi avtoparkterdiń baqylaý-jelilik qyzmetine aýysady. Kondýktorlardyń taǵy bir bóligi avtobýstarda JTEJ jumysy jónindegi keńesshi bolyp jumys isteıtin bolady», - dedi Igenberdınov.
Sondaı-aq, basqarma basshysy jańa júıeniń enýine baılanysty alaıaqtyqpen kúresý joldaryn da aıta ketti.
«Alaıaqtyqty boldyrmaý maqsatynda kóliktik baqylaý departamentinde arnaıy ınspektorlar jumys isteıdi. Olar kez kelgen ýaqytta, kez kelgen avtobýsqa kirip, valıdatordy isten shyǵaryp, jolaýshylardyń kartasyn arnaıy qurylǵy arqyly tekserip shyǵady, jolaýshynyń jolaqyny tólemegeni anyqtalǵan jaǵdaıda qolma-qol tóleý talap etiledi. Eger odan bas tartsa, «qoǵamdyq kólikte jol júrgeni úshin aqy tóleýden jaltarý» jáne «qalalyq jəne qala mańyndaǵy qoǵamdyq kólikti paıdalaný qaǵıdalaryn buzý» aıyptary boıynsha eki aılyq eseptik kórsetkish mólsherinde (2018 j. 2 AEK - 4 810 teńge) aıyppul salynady, - dedi basqarma basshysy.
