«Astana» «Qyzyljardan» jeńilip qaldy

ASTANA. QazAqparat – Búgin fýtboldan premer-lıga komandalary arasyndaǵy el birinshiliginiń 17-týrynda elordalyq «Astana» Petropavlda «Qyzyljarmen» kezdesti, dep habarlaıdy QazAqparat tilshisi.

Elordalyq klýb sońǵy bes oıynda eki márte teń tústi. Saldarynan týrnır kestesinde ekinshi orynǵa yǵysty. Birinshi oryndaǵy Shymkenttiń «Ordabasy» klýbynan úsh upaıǵa artqa qalyp qoıdy.

Sondyqtan búgingi kezdesýde elordalyq komanda jeńiske jetýge bar kúshin salatyny anyq edi.

Kezdesý taǵdyryn 89-mınýtta petropavldyq komandadan Rafael Ospanov soqqan jalǵyz gol sheshti.

Osylaısha «Astana» qarsylasyna 0:1 esebimen jol berdi.

Endi 21:00-de «Qaısar» (Qyzylorda) men «Qaırat» (Almaty), «Aqsý» (Pavlodar oblysy) men «Shahter» (Qaraǵandy) oınaıdy.

Al 30 shildede «Kaspıı» (Aqtaý) men «Aqtóbe», «Atyraý» men «Jetisý» (Taldyqorǵan) kezdesedi.

Atalǵan týrdyń 10 shildede aldyn ala ótkizilgen oıynynda «Oqjetpes» (Kókshetaý) «Ordabasy» (Shymkent) komandasyna 0:4 esebimen jol berdi.

Al «Maqtaaral» (Túrkistan oblysy) men «Tobyl» (Qostanaı) kezdesýi belgisiz merzimge keıinge qaldyryldy.