Astana - Qyzylorda - Astana jolaýshylar poıyzdary shuǵyl toqtatyldy

ASTANA. QazAqparat - Jel men ylǵaldylyqty qospaǵanda, aýa temperatýrasynyń mınýs 35 gradýsqa tómendeýine baılanysty, Astana «Nurly jol» - Qyzylorda baǵytyndaǵy №92 jáne keri baǵyttaǵy №91 jolaýshylar poıyzdary toqtatyldy, dep habarlaıdy QazAqparat «Jolaýshylar tasymaly» AQ baspasóz qyzmetine silteme jasap.

№92 poıyzy Aısa stansasynda toqtatylyp, Qaraǵandyǵa qaıtaryldy. Sol jerde jolaýshylarǵa bılettiń quny túgel qaıtarylady.

Ulttyq tasymaldaýshy shuǵyl sharalardy qarastyryp jatyr.

Atap aıtqanda, jolaýshylardy dittegen stansalaryna jetkizip salý úshin №86 Astana - Saryaǵash poıyzyna jalǵanyp, keste boıynsha jiberiletin qosymsha 6 kýpe vagony ázirlendi.

Sonymen qatar Qaraǵandy stansasynda toqtatylǵan reıs bıletteriniń aqshasyn qaıtaryp, №86 Astana - Saryaǵash jáne basqa poıyzdarǵa bılet rásimdeý jumystary qarqyndy júrip jatyr.

Jolaýshylarǵa tegin tamaq berilip, qalypty temperatýra rejımi saqtalyp otyr.

Reıstiń toqtatylǵany týraly habar osy poıyz ótetin vokzaldardyń anyqtama bólimderi arqyly jáne daýystap habarlanyp jatyr.