Astana qytaılyq týrısterdi qabyldaýǵa daıyndalýda
ASTANA. QazAqparat - Astanada qytaılyq týrısterge qolaıly jaǵdaı týǵyzý maqsatynda «Welcome to Astana» saıty men mobıldik qosymshasy ashyldy. Elordaǵa kelgen qytaılyq týrıster ózine qajetti aqparatty osy saıt pen qosymshadan qytaı tilinde ala alady. Bul týraly búgin «Astana Konvenshn Bıýro» JShS-niń dırektorynyń orynbasary Asqar Adambekov habarlady.
Onyń aıtýynsha, bıyl qytaılyq týrısterdi qabyldaıtyn elordanyń 10 qonaq úıi daıyndalǵan. Qalalyq ákimdik qytaılyq týroperatorlardyń sanyn 7 myńǵa jetkizý josparlap otyr. Týrıstik ınfraqurylymdy qytaılyq qonaqtarǵa beıimdeý maqsatynda barlyq jaǵdaılar jasalmaqshy. «Biz búgin «Welcome to Astana» saıty men mobıldik qosymshasyn iske qostyq. Ol qytaılyq týrısterge ózine qajetti aqparattyń barlyǵyn qytaı tilinde alýǵa múmkindik beredi. Mysaly, olar birden qaladaǵy baǵytyn anyqtaı alady, taksı qyzmetine júginedi, qonaq úı tańdaıdy»,-dep áńgimeledi baspasóz máslıhatynda Asqar Adambekov.
Qazaqstandyq týrıstik qaýymdastyqtyń tóraıymy Gaýhar Jeńisbektiń pikirinshe, qytaılyqtar qazir álemdegi №1 týrıske aınaldy. «Olar úshin Qazaqstan jaqyn ornalasqan týrıstik núktelerdiń biri. Demek bizdiń elimizdiń bul baǵytta keremet múmkindikteri paıda bolýda»,- dedi ol.
Ol Astanada qytaılyq týrızmge qatysty panazıattyq konferentsııanyń ótkizilýi - bul ortaazııalyq aımaqtaǵy elderdi biriktirip, jahandyq deńgeıdegi jalpyǵa ortaq tanymal brendti qurýǵa degen alǵashqy qadam ekenin málim etti. «Týrıstik qyzmet kórsetý deńgeıin kóterý máselesin qolǵa alamyz. Bul baǵyttaǵy qyzmettiń bári bir júıege biriktirilse, elimizge keletin týrıstik joldamanyń quny asa qymbat bolmaýy kerek. Biz qazir qytaılyq týrısterdiń Qazaqstanǵa degen zor qyzyǵýshylyǵyn kórip otyrmyz. Sol sebepten asa sapaly týrıstik ónimder daıyndaýǵa tıispiz. Bul jerde týrıstik saladaǵy bızneske kóp jaýapkershilik júkteledi. Eń bastysy, biz bul qadamymyzdy durys, ári qytaılyq týrıstiń kóńilinen shyǵatyndaı etip jasaýymyz kerek»,- dedi ol baspasóz máslıhatynda.
Aıta ketelik, 24-25 maýsym kúnderi Astanada qytaılyq týrızm boıynsha birinshi panazıattyq konferentsııa ótedi. Konferentsııanyń maqsaty - týrısterdi tartý jáne Qazaqstan men Orta Azııanyń tartymdylyǵyn arttyrýǵa qatysty strategııa men mehanızmderdi ázirleý. Atalǵan basqosýǵa 250 memlekettiń ókilderi qatysady. Ony ótkizýge bastama kóterýshi jáne «Chinese Friendly Kazakhstan»-nyń negizin salýshy Gaýhar Jeńisbek.
Qytaılyq týrısterdiń álemdegi №1 týrıske aınalǵanyn aıttyq. Endi osyǵan statıstıkalyq turǵydan dálel keltireıik. Mysaly, ótken jyly Azııa-Tynyq muhıty aımaǵynda 50 mıllıonnan astam qytaılyq týrıster demalǵan. Sonyń nátıjesinde aımaqtaǵy týrıstik ınfraqurylymy jaqsy damyǵan elder 45 mıllıard AQSh dollarynan astam paıda taýypty. Bul - úlken túsim.
Atalǵan konferentsııany uıymdastyrýshylar álemdik deńgeıdegi sarapshy-mamandardy shaqyrǵanyn habarlady. Olardyń aıtýynsha, Astanadaǵy basqosýǵa WTCF bas hatshysynyń orynbasary Yan Han myrza, ıÝNESKO-nyń ókili Jose Maria Chiquillo Barber, Silk Road Chamber of International Commerce-niń bas dırektory Li Zhonghang myrza keledi dep kútilýde. Qazaqstandyq týrızmdi damytý tujyrymdamasyna sáıkes, konferentsııanyń basty taqyryby jańa týrıstik baǵyt - Jibek Jolyn damytýǵa arnalady.
