Astana qysqy Azııa oıyndary kezinde sporttyq sharaǵa qatysý úshin arnaıy keletin 5 myńǵa jýyq adamdy kútýge daıyn bolýy tıis
áýirdiń 22-si. QazAqparat /Aıdar Ospanalıev/ -«VII qysqy Azııa oıyndary 2011 jyldyń qańtar aıynyń 30-da bastalady. Al uıymdastyrýshylar úshin qysqy olımpıada budan erterek bastalady.
Sebebi qysqy oıyndar bastalardan keminde 20 kúni buryn biz elge keletin qonaqtar qalaǵa qonystanyp, klımattyq jaǵdaıǵa beıimdelýleri úshin barlyq múmkindikterdi jasaýymyz qajet», deıdi «VII qysqy Azııa oıyndary men olımpıada alaýy estafetasyn uıymdastyrý jónindegi qalalyq dırektsııa» memlekettik kommýnaldyq qazynalyq kásipornynyń dırektory Naıl Nýrov. Bul týraly ol búgin «VII qysqy Azııa oıyndary: daıyndyq deńgeıi jáne birlesken qımyldardyń basym baǵyttary» atty dóńgelek ústel otyrysynda málim etti, dep habarlaıdy QazAqparat.
Onyń sózine qaraǵanda, qazirgi ýaqytta Azııa oıyndarynyń baǵdarlamasy tolyq daıyndalyp bitti. Oǵan sáıkes, elordada mánerlep syrǵanaý, short-trek, erler arasyndaǵy hokkeı, konkımen jarys sııaqty sporttyq sharalar uıymdastyrylady. Sonymen qatar shaharda Azııa oıyndarynyń ashylýy men jabylý saltanaty ótedi. Buǵan qosa elordada Azııanyń olımpıadalyq keńesiniń Bas assambleıasynyń májilisi ótedi. Oǵan Azııadaǵy 45 memlekettiń ókilderi qatysady. «Búginge deıin Azııa oıyndaryna qatysýǵa Azııanyń 32 olımpıada komıteti usynys bildirdi. Jalpy alǵanda biz elimizge aıtýly sporttyq sharaǵa qatysý úshin 1 myń 400 sportshy keledi dep kútýdemiz. Tóreshiler men qyzmet kórsetýshilerdi jáne 1 myńnan astam aqparat quraldarynyń ókilderin qosa alǵanda, Azııa oıyndaryna qatysý úshin arnaıy tirkeýden ótken 5 myńǵa jýyq azamattardy qarsy alýǵa daıyn bolýymyz qajet», dedi dırektor.
Onyń sózine qaraǵanda, sharaǵa taǵy birqatar joǵary laýazymdy tulǵalar qatysady dep kútilýde. Atap aıtqanda, Halyqaralyq olımpıada komıtetiniń prezıdenti Jak Rogı keledi dep kútilýde.
