«Astana» quramyna albanııalyq qorǵaýshy qosyldy
NUR-SULTAN. QazAqparat - Elordalyq «Astana» fýtbol komandasy albanııalyq qorǵaýshy Eneo Bıtrımen kelisimshartqa qol qoıdy, dep habarlaıdy QazAqparat tilshisi klýbtyń baspasóz qyzmetine silteme jasap.
Eneo Bıtrı 1996 jyldyń 26 tamyzynda sol eldiń Berat qalasynda dúnıege kelgen.
Budan buryn óz elinde «Tomorı», «Partızanı» jáne «Kamza» klýbtarynda dop tepti.
Óziniń kásibı mansabynda ol Albanııa chempıony ataǵyna qol jetkizip, el kýbogynyń ıegeri atanǵan.
«Men «Astanamen» birge úlken jeńiske jetkim keledi. Barlyq maqsattqa qol jetkizýge úles qosýǵa tyrysamyn. Men klýb pen qala týraly kóp estidim. Maǵan Nur-Sultan unady. Shyn máninde zamanaýı jáne ádemi qala eken», - dedi albanııalyq fýtbolshy.
Aıta ketsek, «Astana» sapynan Arazdat Aroıan Ispanııanyń «Kadıs» klýbyna aýysqan edi.
Eneo Bıtrı komandada sol fýtbolshynyń ornyn almastyrady dep kútilýde.
