Astana quramasy velosporttan kúmis júldege ıe boldy
ASTANA. 30 mamyr. QazAqparat - Astanada 23-28 mamyr aralyǵynda «Saryarqa» respýblıkalyq velotregindegi jastar oıyny aıasynda trektegi jarys ótti.
Qazaqstan astanasyndaǵy oıyn básekesine Astana, Almaty qalalary men Jambyl, Qaraǵandy, Almaty, Pavlodar, Qyzylorda, Shyǵys Qazaqstan, Qostanaı, Ońtústik Qazaqstan, Soltústik Qazaqstan jáne Batys Qazaqstan oblystarynan - barlyǵy 13 komanda qatysty. Bul týraly astana.kz saıty habarlaıdy.
Astana qalasynyń Týrızm, dene tárbıesi jáne sport basqarmasynyń habarlaýynsha, elorda quramasynda 18 sportshy bolǵan.
Bes jarys kúniniń qorytyndysy boıynsha elordalyq sportshylar 6 altyn, 1 kúmis, 5 qola medaldi qorjyndaryna saldy. Komandalyq esepte Astana komandasy 677 upaı jınap, ekinshi orynǵa taban tiredi. Birinshi orynda 796 upaı jınaǵan Qaraǵandy oblysy bolsa, jalpy komandalyq úshinshi oryn 529 upaıdy ıelengen Almaty oblysynyń ókilderine buıyrdy.
Jastardyń bul oıynyna Astana qalasynyń quramasyn velosport boıynsha QR eńbegi sińgen jattyqtyrýshy Vladımır Berezın daıyndaǵan bolatyn. Ol óziniń shákirtteriniń jetistikterine dán rıza, - dep atap kórsetedi vedomstvonyń baspasóz qyzmeti. Endi astanalyqtar 2013 jyldyń 17-23 maýsym kúnderi Taldyqorǵan qalasynda ótetin jastardyń tas joldaǵy oıynyna qatysýdy josparlaýda.
