Astana kúnine oraı ótken velosherýge 700-ge jýyq áýesqoı sportshy qatysty
ASTANA. KAZINFORM – Astana kúnine oraı buqaralyq velosherý uıymdastyryldy.
Elorda ákimdigi resmı saıtynyń málimetinshe, velosıped maýsymy bastalǵaly beri «Jasyl beldeý» aýmaǵynda tórtinshi márte buqaralyq velosherý ótkizilip jatyr.
Jaz mezgili mektep oqýshylary men kóptegen qyzmetkerlerdiń demalys ýaqytyna sáıkes kelgendikten, úlken qalalarǵa aǵylatyny belgili. Kezekti velosherýge osy maýsymdaǵy eń kóp 605 áýesqoı sportshy bas qosty.
Dástúrli 25 shaqyrymdyq qashyqtyqty baǵyndyrýǵa qatysýshylar Úrker eldi mekeniniń «Jasyl beldeý» saıabaǵyna deıingi aralyqty júrip ótti.
Búgingi velosherýge Astana qalasynyń turǵyndarynan bólek, Aqmola, Almaty, Atyraý, Jambyl, Pavlodar oblystary jáne Shymkent qalasynan da qatysty.
«Atyraý oblysynan keldim. Qazirgi ýaqytta Astanada oqý-jattyǵý jıyndaryn ótkizip jatyrmyz. Aldaǵy kúnderi veloshosseden chempıonatqa qatysamyz. Búgin demalys bolǵandyqtan, jattyǵýdan bólek, «Jasyl beldeýdi» de kórdim. Jap-jasyl. Aýasy taza, typ-tynysh. Jol boıy keremet sýretterge túsip keldik. Qala kúni ýaqytyna tuspa-tus kelgenimizge qýanyshtymyn!» - dedi Jantilek Joldas.
Sondaı-aq qatysýshylar arasynda lotereıa oınatylyp, nátıjesinde 10 adam velosıped utyp aldy.
«Astana qalasy jyl saıyn keńeıip, sport ortalyǵyna aınalyp keledi. Ár apta saıyn buqaralyq júgirý, velosport t.b jarystar jıi ótedi. Al «Jasyl beldeýdiń» orny bólek. Kádimgideı sergip qalasyń. Aýa raıy da óte qolaıly boldy. Іs-shara sońynda lotereıadan velosıped te utyp aldym. Bul da men úshin qosymsha qýanysh. Barshańyzdy kele jatqan qala kúnimen quttyqtaımyn!», - dep qala turǵyny Serik Halelov óz qýanyshymen bólisti.
Merekeniń sońynda dástúr boıynsha barlyq qatysýshylarǵa palaý men tátti kompot taratyldy.
