Astana kúnine oraı halyqaralyq kóshe qoıylymdary festıvali ótedi

Jyl saıyn uıymdastyrylatyn mádenı shara Qazaqstan men shetelden kelgen ártisterdiń basyn qosyp, elordanyń kósheleri, alańdary men saıabaqtaryn zamanaýı teatr óneriniń ashyq sahnasyna aınaldyrady.

Eki kún boıy qala turǵyndary men qonaqtary ashyq aspan astyndaǵy erekshe qoıylymdardy tamashalap, kóshe teatrynyń túrli janrlarymen tanysyp, aýqymdy mádenı is-sharanyń bir bólshegine aınalady. Festıvaldiń basty maqsaty — teatrdy dástúrli sahnadan tys keńistikke shyǵaryp, ónerdi barshaǵa qoljetimdi etý jáne ártister men kórermender arasyndaǵy jandy baılanysty qalyptastyrý.

Festıvaldiń saltanatty ashylýy 5 shilde kúni ótedi. Іs-shara saǵat 13:00–de Amfıteatr ǵımaratynan bastalatyn halyqaralyq merekelik sherýmen ashylady. Sherý Atyraý kópiri arqyly ótip, Qalalyq alańda aıaqtalady. Munda kórermenderge áserli performanstyq baǵdarlama usynylady. Sherýge kóshe teatry men zamanaýı performans óneriniń túrli baǵyttaryn usynatyn shyǵarmashylyq ujymdar men ártister qatysady.

Festıvalge Qazaqstannyń alty kóshe teatry qatysady. Olar: «Tamenov Show» (Almaty), «Akademııa shoý» (Astana), «Teatr dlıa moeı ptıchkı» (Almaty), «Totalnyı teatr» (Almaty), «ArtıShok» (Almaty) jáne «A3» (Astana). Halyqaralyq baǵdarlama aıasynda Reseıdiń Sankt-Peterbýrg qalasynan kelgen «AspektR» kóshe teatry óner kórsetedi.

Festıvaldiń negizgi is-sharalary birneshe qalalyq alańda ótedi:
5 shilde, saǵat 14:00 — Qalalyq alań;
6 shilde, saǵat 14:30 — «Jetisý» saıabaǵy.
III Halyqaralyq kóshe performanstary festıvali Astana kúnine arnalǵan merekelik baǵdarlamanyń eń jarqyn oqıǵalarynyń birine aınalyp, qala turǵyndary men qonaqtaryna erekshe áser, emotsııalar syılap, elordanyń úırenshikti qalalyq keńistigin jańa shyǵarmashylyq formatta kórýge múmkindik beredi.

Aıta ketelik Astana kúnine oraı elordada qandaı sporttyq is-sharalar ótetini týraly jazǵan edik.