Astana kúnine oraı elordada qandaı sporttyq is-sharalar ótedi

Bul týraly qalalyq kommýnıkatsııalar qyzmetinde ótken baspasóz májilisinde Astana qalasy ákimdiginiń «Sporttyq-buqaralyq is-sharalardy ótkizý dırektsııasy» KMM basshysy Azamat Belgibaev aıtty.

— Astana kúnin merekeleýge arnalǵan barlyq sporttyq is-sharaǵa qatysý da, kórermen retinde tamashalaý da tegin. Baǵdarlama qala turǵyndary men qonaqtarynyń barlyq jas sanatyn qamtıdy, — dedi spıker.

Respýblıkalyq jáne qalalyq deńgeıdegi chempıonattar

Merekelik sporttyq baǵdarlama 2 shildede, ıaǵnı búgin bastaldy. Alǵashqy jarys retinde «Tolqyn» sport kesheniniń artyndaǵy eskek esý arnasynda baıdarka jáne kanoede esýden Astana qalasynyń dástúrli chempıonaty ótip jatyr. Chempıonat 4 shildege deıin jalǵasady.

3 shildeden bastap «Aspan» sport kesheninde eresekter arasynda asyq atýdan respýblıkalyq komandalyq chempıonat bastalady. Jarysqa elimizdiń barlyq óńirinen kelgen úzdik asyqshylar qatysady. Týrnırdiń resmı ashylýy 4 shildede ótse, jeńimpazdar 6 shilde kúni marapattalady.

Kids RUN, ulttyq oıyndar jáne Urban Fest

4 shilde kúni Ortalyq saıabaqtaǵy shańǵy-roller trassasynda 6-15 jas aralyǵyndaǵy balalarǵa arnalǵan Kids RUN jarysy uıymdastyrylady. Qatysýshylar 300 metr, 500 metr jáne 1 shaqyrym qashyqtyqtarynda baq synaıdy. Qazir reg.elordasport.kz saıtynda tirkelý jalǵasyp jatyr, qatysýshylar sany myń adammen shektelgen. Barlyq qatysýshyǵa estelik medal tabystalady.

— Sol kúni «Ulytaý» dene shynyqtyrý-saýyqtyrý kesheninde qazaqtyń dástúrli «Jilik syndyrý» oıynynan respýblıkalyq týrnır ótedi. Sonymen qatar Sana Sport sport kesheniniń janyndaǵy skeıt-parkte Astana Day Mass Sports: Gorilla Power Your Instinct Tour 2026 — Urban Fest kóshe sporty festıvali uıymdastyrylyp, skeıtbordıng, BMX, rolık jáne samokat sportynyń ókilderi óz sheberlikterin kórsetedi, — dedi Azamat Belgibaev.

Aýdan turǵyndaryna arnalǵan sporttyq baǵdarlama 

5 shildede «Saryarqa» aýdanynda «Astana — esirtkisiz qala» aktsııasy aıasynda SARYARQA RUN buqaralyq júgirý jarysy ótedi. 16 jastan asqan qatysýshylar 4 jáne 7,6 shaqyrym qashyqtyqtarǵa júgiredi. Uıymdastyrýshylar aıtýynsha, shamamen 1800 adam qatysady.

Sonymen birge mereke kúnderi qalanyń ár aýdanynda áýesqoılar arasynda voleıbol týrnıri, erekshe qajettiligi bar balalarǵa arnalǵan «Ómirdi sezin» sporttyq is-sharasy, turǵyndarǵa arnalǵan otbasylyq estafetalar, gir kóterý, asyq atý jáne arqan tartý jarystary uıymdastyrylady.

— Merekelik baǵdarlama ártúrli jas sanatyndaǵy turǵyndardy qamtıdy. Buqaralyq sportty damytýǵa baǵyttalǵan is-sharalar barlyq aýdan turǵyndary úshin qoljetimdi bolady, — dedi Azamat Belgibaev.

Astana kúniniń basty dodalary

6 shildede Trıatlon parkinde 14-15 jastaǵy jasóspirimder arasynda «Jas Qyran» kúres festıvali ótedi. Onda erkin kúres, grek-rım kúresi, qazaq kúresi, dzıýdo jáne grepplıng boıynsha beldesýler uıymdastyrylady.

Sol kúni «Han Shatyr» mańynda balalar men eresekter arasynda «Astana saqasy» asyq atý jarysy ótedi. Sonymen qatar Qorǵaljyn saıabaǵynda jáne Astana qalasy ákimdigi aldyndaǵy alańda ulttyq sport túrlerinen buqaralyq jarystar uıymdastyrylady.

Qala kúnine arnalǵan sporttyq baǵdarlamanyń qorytyndysy retinde dástúrli «Tolaǵaı» alyptar týrnıri ótedi. Bıylǵy dodada Qazaqstannyń úzdik 20 palýany tas kóterý, ziltemirdi ustap turý, arba tartý jáne basqa da kúsh synasý kezeńderi boıynsha baq synaıdy.

Turǵyndarǵa arnalǵan jazǵy sport baǵdarlamasy

Merekelik is-sharalarmen qatar, elordada jaz boıy turǵyndardy sportqa tartýǵa baǵyttalǵan áleýmettik jobalar jalǵasady.

— Qalanyń saıabaqtarynda «Ioga» jáne «Skandınavııalyq júris» jobalary aıasynda tegin jattyǵýlar ótip jatyr. Sonymen birge barlyq alty aýdanda Aula Fit jobasy júzege asyrylyp jatyr. Shildeniń ortasynan bastap balalar men jasóspirimderge arnalǵan Aula Football jobasy bastalady. Budan bólek, «Ózińnen basta!» jáne Street Workout jobalary aıasynda da turaqty jattyǵýlar uıymdastyrylyp keledi, — dedi mekeme basshysy.

Onyń aıtýynsha, barlyq áleýmettik-sporttyq jobaǵa shamamen 30 myń adam qatysady dep josparlanyp otyr. Bul bastamalar buqaralyq sportty damytýǵa, halyq densaýlyǵyn nyǵaıtýǵa jáne salaýatty ómir saltyn keńinen nasıhattaýǵa yqpal etpek.

Buǵan deıin 6 shilde kúni HQO-lar qalaı jumys isteıtini jóninde jazdyq.