Astana kúninen túsken qarajat 30-dan astam múgedek balanyń emine bólindi

ASTANA. QazAqparat - Búgin Astana ákimdiginde múgedek balalardy tárbıelep otyrǵan otbasylarǵa em-domǵa qajetti aqshalaı sertıfıkattar tabystaldy.

Jumyspen qamtý jáne áleýmettik baǵdarlamalar basqarmasynyń basshysy Alma Altybaevanyń aıtýynsha, 2008 jyldan beri «Báıterek» qaıyrymdylyq qory osy maqsattarǵa qarajat jınaýmen aınalysyp keledi.

«Biz jylyna eki ret qaıyrymdylyq aktsııalaryn ótkizemiz - ol Astana kúni men Jańa jyldyq ball. Olardan túsken qarajattardy biz muqtaj balalarǵa berip kelemiz», - deıdi ol.

Onyń sózi boıynsha, 2008 jyldan beri osyndaı sertıfıkattarǵa 96 balaǵa jalpy kólemi 103 mln. teńge bolatyn qarjy tabys etilgen.

«Bıyl Astana kúninde ótkizilgen qaıyrymdylyq sharalary barysynda 25 mln. teńge jınaldy. Bul qarajat leıkozben jáne mı isigine dýshar bolǵan 33 jetkinshekke úlestirilip otyr», - dedi A. Altybaeva.