«Astana kúnine» oraı zańgerler turǵyndarǵa tegin keńes berdi
ASTANA. QazAqparat - «Astana kúnine» oraı Ádilet organdary merekege óz úlesin qosý úshin qaıyrymdylyq aktsııalaryn ótkizýde, dep habarlaıdy Astana qalasy Ádilet departamentiniń baspasóz qyzmeti.
Mereke qarsańynda Astana qalasy Ádilet departamenti tájirıbeli zańgerlerdiń basyn qosyp, qala mańyndaǵy kentterde, áleýmettik mekemelerde zeınetker, múgedek jandarǵa sottalýshylarǵa zańdyq jaǵynan tegin kómek kórsetý úshin arnaıy aqparattyq nasıhat tobyn qurdy. Topqa Ádilet departamentiniń jaýapty qyzmetkerleri, qalanyń Kóshi-qon polıtsııasy men Eńbekpen qamtý jáne áleýmettik baǵdarlamalar basqarmasynyń "Jyljymaıtyn múlik ortalyǵy" RMM-niń qyzmetkerleri, Advokattar alqasy, Notarıaldyq palata, Sot aktilerin oryndaý departamenti jáne qalanyń basqa da memlekettik mekemeleriniń qyzmetkerleri qatystyryldy. Aktsııa aıasynda aqparattyq nasıhat toby Kóktal-2 kenti turǵyndarymen kezdesti. Jıynda zańgerler zańdyq keńes berip qana qoımaı, azamattardy jeke suraqtary boıynsha qabyldap, kezdesýde kóterilgen máselelerdiń sheshilýin baqylaýǵa alatynyn jetkizdi. Kent turǵyndary mundaı is-sharaǵa rızashylyqtaryn bildirdi. Aktsııa «Nur Otan» partııasynyń Qoǵamdyq qabyldaýynda jalǵastyrylatyn bolady.
