Astana kúnine oraı uıymdastyrylatyn kontsertterge bıletterdiń satylý qarqyny joǵary
ASTANA. 14 maýsym. QazAqparat /Gúlmıra Álıakparova/ - Astana kúnine arnalǵan merekelik sharalardy uıymdastyrýshylar, álemdik juldyzdardyń kontsertterin tamashalaǵysy keletin azamattarǵa bıletterdi satyp alýǵa asyǵýǵa keńes berdi, sebebi, olardyń sóziderine qaraǵanda, kirý bıletteri «ystyq baýyrsaqtaı» jyldam satylý ústinde.
Astanadaǵy merekelik is-sharalardyń resmı saıtynda jazylǵandaı, shildeniń 3-i kúni shymyldyǵyn ashatyn Sergeı Bezrýkovtyń «Pýshkın» spektakline (bıletter quny 3 -15 myń teńge aralyǵynda) jáne 5-i kúni ótetin Lara Fabıan men Igor Krýtoıdyń kontsertine (3 -15 myń tg.) qazirdiń ózinde bıletterdiń 30 paıyzy satylyp ketken.
Bıyl Astana kúni qurmetine uıymdastyrylatyn eń qymbat kontsert - brıtan rok janrynyń patshasy, megajuldyz - Stıngtiń «Symphonicity» jeke kontserti bolmaq. Stıngtiń 4 shilde kúni «Saryarka» respýblıkalyq velotrekte Sara Hıkstiń jetekshiligindegi sımfonııalyq orkestrdiń súıemeldeýimen beretin kontsertine bıletterdi 7 -100 myń teńge aralyǵyndaǵy baǵaǵa satyp alýǵa bolady. Óner súıer qaýym úshin ázirshe, 10 myń jáne 50 myń teńge aralyǵynda bıletter qol jetimdi.
Astana kúni qurmetine otandastaryn óz ónerlerimen Qazaqstannyń tanymal juldyzdary da qýantatyn bolady. 1 shilde kúni «Qazaqstan» Ortalyq kontsert zalynda Nurjamal Úsenbaeva shyrqasa, 2 shildede Kongress-Holl saraıynda óziniń ásem ánderin kórnekti ánshi Roza Rymbaeva tartý etetin bolady. Bıletter baǵasy 2 -6 myń teńge aralyǵynda. Olardy qala kassalarynan nemese www.biletiastana.kz saıtynda tapsyrys berý arqyly satyp alýǵa bolady.
«Atalmysh sharalardy tamashalaǵysy keletinder erterek qımyldaǵandary abzal. Sebebi byltyr barlyq kontsertterge bıletter maýsymnyń 25-inde satylyp bolǵan», - dep atap ótti uıymdastyrýshylar.
Astanadaǵy merekelik is-sharalardyń resmı saıtyndaǵy málimetterge súıensek, Tımýr Bekmambetovtyń uıymdastyrýymen Astanada osymen ekinshi ret ótkeli otyrǵan"ASTANA" Halyqaralyq ekshn-fılmder kınofestıvaline barlyq bıletter satylyp boldy.
