Astana kúnine oraı «Romeo men Djýletta» álemdik baleti alǵash ret qalqymaly kópir ústinde qoıylady

Astana kúni merekesin atap ótý aıasynda bıyl kezekti ret Esil ózeniniń ústinde «Áýen - aǵys» klassıkalyq mýzyka jáne balet keshi ótedi. Esil jaǵalaýyndaǵy aspaptyq mýzyka keshteri alǵash ret 2008 jyly, Astana qalasynyń 10 jyldyq mereıtoıyna oraı uıymdastyryldy. Qalalyqtar men elorda qonaqtarynyń kóńilinen shyqqan kesh dástúrge aınaldy. 4-6 shilde kúnderi aralyǵynda ótetin bıylǵy kontserttiń baǵdarlamasyna engizilgen jańashyldyq - ártúrli janrlarmen usynylatyn mýzykalyq ekletıka.

Búgin ótken baspasóz máslıhatynda stsenarııshi Igor Frolov, «Áýen - aǵys» keshi óner súıer qaýym úshin kezekti ret jańa ári qyzyqty baǵdarlamalar usynatynyn jetkizdi. «Tosynsyılardyń barlyǵyn ashpaımyn, tek olardyń arasynda Sergeı Prokofevtiń qoıylymyndaǵy Ý.Shekspırdiń «Romeo men Djýletta» baleti baryn aıta alamyn. Kontsertter serııasy álemge belgili osy baletpen ashylatyn bolady», - dep atap ótti ol.

Aıta keteıik, balettiń tusaýy alǵash ret 1938 jyly Brno qalasynda (Chehoslovakııa) kesildi, odan keıin ol álem elderiniń yqylasyna bólendi. «Romeo men Djýletanyń» Astana qalasyndaǵy ereksheligi - balettiń alǵash ret qalqymaly kópir ústinde qoıylýy. Sol sebepti bıshilerge eki ese kúsh-jiger salýlaryna týra keledi.

Kelesi kúni, 5 shildede kontsertti N.Úsenbaeva, J.Baspaqova, S.Baısultanov, G.Dáýirbaeva, S.Rahmetova, D.Tabyldy syndy opera juldyzdary, Abaı atyndaǵy Memlekettik akademııalyq opera jáne balet teatrynyń balet trýppasy jáne sımfonııalyq orkestr operaly-balet gala-kontsertimen jalǵastyrady.

Merekelik baǵdarlamany 6 shilde kúni sımfonııalyq orkestr qazaq jáne álemdik belgili klassıkalyq mýzykalarmen aıaqtaıdy.