Astana kúnine oraı Qyzylorda oblysynda birqatar áleýmettik nysandar ashyldy (FOTO)
QYZYLORDA. QazAqparat - Búgin Astana kúni qarsańynda Aral aýdany Qamystybas eldi mekeninde 150 oryndyq Mádenıet úıi el ıgiligine paıdalanýǵa berildi. Bul týraly oblystyq ákimdiktiń baspasóz qyzmeti habarlady.
Aýyl halqyna rýhanı nár beretin eki qabatty Mádenıet úıi kitaphana, bı zaly, 150 oryndyq akt zaly, grım jasaıtyn bólme, úıirme bólmeleri jáne kınoqondyrǵy, mýzykalyq aspaptarmen jabdyqtalǵan. Endi jańa mádenı oshaq jastardyń bos ýaqytyn tıimdi ótkizýlerine sebep bolmaq.
Aýyl turǵyny Janar Uzaqbaeva: «Astana kúni merekesi qarsańynda ashylǵan aýyldyq klýb biz úshin úlken syı bolyp otyr. Buryn mádenıet oshaǵy bolǵanymen, dál osyndaı zamanaýı úlgide bolǵan joq. Sol úshin qýanyshtymyz», - dedi.
Aýyldyq klýbtyń ashylý saltanatyna oblys ákiminiń orynbasary Serik Qojanııazov qatysyp, aýyl turǵyndarynyń qýanyshyna ortaqtasty. Mádenı shara barysynda sóz alǵan oblys ákiminiń orynbasary elimizde halyqtyń ál-aýqatyn kóterý úshin jasalynyp jatqan jumystarǵa toqtala kelip, jańa mádenı oryndardyń ulttyq ónerimizdiń damýyna serpin beretinine senimin bildirdi. Munan soń, ıgilikti iske jıylǵandar Aqan Sataevtyń «Jaýjúrek myń bala» fılmin tamashalady.
Sondaı-aq, Qazaly aýdany Janqoja batyr aýylynda 90 oryndyq «Jaýqazyn» balabaqshasy ashyldy. Ashylý saltanatyna oblys ákiminiń orynbasary Serik Qojanııazov qatysyp, memleketimizdiń tiregi, ulttyń bolashaǵy - balalarymyzdyń ósip, oqyp, bilim alýy, azamat bolyp, qalyptasýy úshin barlyq jaǵdaı jasalyp jatqanyn aıtty.
Aıta keteıik, Qazaly aýdany boıynsha 56 mektepke deıingi uıymda 4 myńnan astam bala tábıelenýde, 3-6 jas aralyǵyndaǵy balalardyń balabaqshamen qamtylýy 89 paıyz. Bıylǵy jyldyń sońyna deıin oblys boıynsha bul kórsetkishti 100 paıyzǵa deıin jetkizý josparlanyp otyr.
