Astana kúnine oraı 70-ke jýyq shara ótkiziledi
ASTANA. QazAqparat - Aldymyzda kele jatqan Astana kúni merekesi qarsańynda elordada jańa nysandar paıdalanýǵa berilip, saıabaqtar ashylady. Sonymen qatar, aıtýly kúnge oraı Astana tórinde 70-ke jýyq shara ótkizilmek. Bul jaıynda búgin Ortalyq kommýnıkatsııalar qyzmetiniń kezekti brıfıngi barysynda aıtyldy.
«Astana - Elbasy ıdeıalarynyń eń tamasha týyndylarynyń biri. Aldaǵy Astana kúni toıynda biz elordanyń memlekettiń damýyndaǵy róline kóńil bólemiz. Barlyq sharalardyń ıdeologııalyq mazmuny bar, olar osynysymen qundy. Jyldaǵy dástúrli sharalardan basqa baǵyty bólek, mazmuny jańa sharalar osyny aıǵaqtaıdy. Jalpy barlyǵy 70-ke jýyq sharalar ótkizý josparlanǵan. Onyń ishinde qala kósheleri men saıabaqtary jáne gúlzarlarynda ótetin sharalarǵa basty nazar aýdarylyp otyr. Negizinen mundaı sharalar kóbine el kóńilinen shyǵady. Al endi aýqymdyq deńgeıdegi sharalardyń qatarynda «Aıalaǵan Astana» televızııalyq baıqaýy, teatr festıvali, «Máńgilik El» músháırasy, otandyq oryndaýshylardyń «Án júregim Astana!», «Shýaqty qala Astana» kontserti bar», - dedi Astana qalalyq ishki saıasat basqarmasynyń jetekshisi Bolat Tilepov.
Basqarma jetekshisi Astana kúnine oraı ótkizeletin sharalar mádenı baǵdarlamalarmen ǵana shektelip qoımaıtyndyǵyn da atap ótti.
«Astana kúni degenimiz bul tek toı-dýman emes. Qalanyń ózge jaǵdaılaryna kóńil bólýdi qolǵa alyp otyrmyz. Atap aıtsaq, «Almaty» jáne «Saryarqa» aýdandarynyń úılerin abattandyrý, jaryqtandyrý, sport alańqaılaryn salý qolǵa alyndy», - dedi basqarma basshysy.
Astana qalalyq Mádenıet basqarmasy jetekshisi Bolat Majaǵulov bolsa bıyl Astanada kóshe sharalary kóp bolatyndyǵyn aıtyp otyr.
«Bıyl ótken jyldyń qorytyndysy boıynsha biz qala turǵyndary men qonaqtary arasynda áleýmettik saýalnama júrgizdik. Sol sebepti biz bıyl kóshe sharalaryna basymdylyq berýdemiz. Bıylǵy jyly qalada jańa saıabaqtar salyndy. Ár park ózinshe erekshelikterge ıe», - deıdi ol.
Sonymen qatar, basqarma basshysynyń aıtýynsha, Astanada álemdik opera juldyzy Anna Netrebko, La Scala teatry, estrada juldyzy Akon, Blue toby, Polına Gagarına, Larısa Dolına jáne ózge de óner juldyzdary kelmek. Alaıda, bul joly otandyq juldyzdarǵa erekshe basymdyq beriletin bolady.
«Jyl saıyn biz merekege bólinetin qarajat shyǵynyn ońtaılandyrý jaǵyn esekeremiz. Biz qala kúni merekesinde tepe-teńidkti saqtaý úshin kommertsııalyq baǵyttaǵy, mereke shyǵynyn aqtaý maqsatynda uıymdastyrylatyn sharalardan bólek halyq úshin tegin de sharalar ótkizemiz. Mysalǵa, «A-stýdıo» tobyna kontserttik zal men jarnama berip otyrmyz», - deıdi basqarma jetekshisi.
Onyń esebine sensek, bıyl merekege shamamen 700 mln teńge qarajat bólingen. Sharaǵa jalpy sany 20 myń adam qatyspaq.
Aıta ketetin taǵy bir jaıt, mereke qarsańynda Astanaǵa arnaý jazǵan aqyndardy marapattaý rásimi de ótedi. Belgili aqyn, S.Seıfýllın atyndaǵy mýzeı dırektory Nesipbek Aıttyń habarlaýynsha, merekelik músháıraǵa 60-tan astap jyr kelip túsken. Qatysýshylar arasynda Qytaı men Mońǵolııa aqyndary da bar kórinedi.
«Bıyl «Máńgilik El - ult muraty» baıqaýyna elimizben qatar Mońǵolııa men Qytaıdaǵy qandastarymyzdan 60-tan astam shyǵarma kelip tústi. Músháıra osymen tórtinshi ret ótip otyr. Osyǵan deıin Táýelsizdik, Otan, Astana taqyryptarynda ótti. Bıylǵy sharanyń ereksheligi - jastardyń kóptep qatysýynda bolyp otyr», - dedi N.Aıtuly.
«Astanyń ásemdigin jyrlaýǵa kelgende aqyndarymyz erekshe shabytpen jyrlady. Osyǵan deıin kelip túsken óleńder kitap bolyp basylady. Bıyl biz 15 aqynǵa júlde taǵaıyndap otyrmyz. Onymen qosa, arnaýly syılyqtarymyz da bar. Bıylǵy jyr merekesi Astanaǵa arnalady. Astana toıynda poezııa da qalys qalmaıtyndyǵyn osylaı kórsetpek. Aldaǵy 1 shilde kúni «Kongres holl saraıynda» qatysqan aqyndarymyzdy marapattaý keshin uıymdastyramyz», - dedi mýzeı dırektory.
