Astana kúnine arnalǵan sharalardy tamashalaýǵa 23 shet el men Qazaqstannyń barlyq óńirlerinen 2 myńnan astam qonaq kelgen
ASTANA. QazAqparat - Astana kúnine oraı elordada 100-den astam túrli mádenı shara ótti. Mereke kúnderi boıy elorda turǵyndary men qonaqtary san-alýan festıvalder men túrli qoıylymdardyń kýási boldy, dep habarlady Astana qalasy ákimdiginen.
Máselen, Astananyń saıabaqtarynda halyqtyq serýen ótip, onda kóńil kótererlik kontserttik baǵdarlamalar men balalarǵa arnalǵan qoıylymdar jáne suraq-jaýap saıysy uıymdastyryldy.
Aıta keterligi, aǵymdaǵy jyly merekelik sharalardyń basym bóligi ashyq alańdarda uıymdastyrylyp, elordanyń árbir turǵyny merekelik kóńil-kúıde sezine aldy.
Astana qalalyq ishki ister departamentiniń aqparatyna qaraǵanda, elorda kúnine arnalǵan sharalardy tamashalaýǵa 23 shet el men Qazaqstannyń barlyq óńirlerinen 2 myńnan astam qonaq kelgen. Osyǵan oraı qala halqy men qonaqtardyń tynyshtyǵyn qorǵaýǵa Іshki ister mınıstrligi Ortalyq apparatynyń 70-ten astam qyzmetkeri jumysqa tartylǵan. Astana kúninde esh tótenshe oqıǵa oryn alǵan joq.
Qala qonaqtarynyń aıtýynsha, qala kúnine arnalǵan barlyq merekelik sharalar óte joǵary deńgeıge ótti. Olar elorda kóshelerinde uıymdastyrylǵan túrli kontsertterdi tamashalaýǵa múmkindik aldy. Máselen, alǵash ret astanada úsh kún boıy álemdik juldyzdardyń qatysýymen qazirgi zaman mýzykasynyń festıvali uıymdastyryldy. Ásirese, Gollıvýd akteri, prodıýser ári rejısser Stıven Sıgaldyń qatysýymen ótken jekpe-jek óneriniń І halyqaralyq festıvali kórermendi tánti etti. Munan bólek, International street dance session atty kóshe bıi festıvali de Eýropadan kelgen sheteldik qonaqtardyń, elordalyqtardyń kóńilinen shyqty.
