Astana kúnine arnalǵan merekelik sharalardyń qorytyndy gala-kontsertine kórermender baǵyttyq jáne arnaıy shyǵarylatyn avtobýstarmen jete alady
ASTANA. Shildeniń 2-si. QazAqparat /Gúlmıra Álıakparova/ - Elordanyń týǵan kúnin merekeleý aıasynda, shildeniń 6-sy kúni «Astana - Arena» jańa stadıonynda ótetin qorytyndy gala-kontsertke kórermenderdi baǵyttyq avtobýstarmen qatar,
arnaıy uıymdastyrylǵan avtobýstar jetkizip salatyn bolady.
«Astana - Arena» jańa stadıonynyń aýmaǵyndaǵy turaqta oryn sanynyń azdyǵyn eskere otyryp, kólik keptelisin boldyrmaý maqsatynda, jol polıtsııasy jekemenshik kólik ıelerine qoǵamdyq kólikke aýysýǵa keńes beredi», - dep atap ótti búgin ótken baspasóz máslıhatynda Astana qalalyq ІІD Jol polıtsııasy basqarmasy bastyǵynyń orynbasary Baqytjan Malybaev.
B.Malybaevtyń aıtýynsha, Ortalyq stadıonǵa jolaýshylardy arnaıy avtobýstar jetkizip salatyn bolady. Olarǵa otyrǵyzý saǵat 16:00-den bastap «Báıterek» monýmenti, Astanalyq tsırk, Qarjy mınıstrligi men «Otan qorǵaýshylar» monýmenti aldyndaǵy alańdarda júrgiziledi. Bir baǵyttaǵy bılettiń quny - 100 teńge. Avtobýs kolonnalaryna jol polıtsııasynyń mashınalary erip júretin bolady.
Jol polıtsııasy ókiliniń sózine sensek, arnaıy avtobýstar keri baǵytta, merekelik shara ornynan sońǵy jolaýshy jetkizilgenge deıin qatynaı bermek. «Eshbir adam dalada qalmaıdy», - deıdi ol.
Sonymen qatar, Ortalyq stadıonǵa Qabanbaı batyr dańǵyly boıymen №12, 18, 21, 27, 28, 30, 35, 40, 41, 42, 43 jáne 47-shi baǵyttaǵy avtobýstar esh kedergisiz júretin bolady.
B.Malybaev, Astana kúnin merekeleý bastalǵan shildeniń 1-inen bastap elordanyń jol polıtsııasy kúsheıtilgen qyzmet rejimine kóshkendigin jetkizdi. Jol boıyndaǵy qaýipsizdikti 400 qyzmetker qamtamasyz etýde.
