Astana kúnine arnalǵan merekelik is-sharalardy jarty mıllıonnan astam adam tamashalady
ASTANA. 11 shilde. QazAqparat - 9 shilde kúni Astana ákimi Imanǵalı Tasmaǵambetov ákimdik keńesinde Elorda kúnin merekeleýdiń qorytyndylaryna baǵa berdi.
Bul týraly qala basshysynyń baspasóz qyzmetinen málim etti.
«Árqaısyńa óz ýchaskelerinde atqarǵan eńbekteriń úshin alǵys bildirgim keledi. Memleket basshysy osy sharalardyń ótkizilý deńgeıi jyl saıyn artyp kele jatqanyn atap ótýde», - dedi ákim.
«Biz sizdermen birge josparlanǵan barlyq 78 is-sharany ótkizdik. Jalpy alǵanda atalǵan sharalardy kórýge jarty mıllıonnan astam adam keldi. Mereke kúnderi qalada 20 úlken kontsert bolyp ótti, olarǵa 70 myńnan astam bılet satyldy. 300 myń elorda turǵyny men qala qonaqtary ashyq alańdarǵa kelip, aralap qaıtty. Astana kúnin uıymdastyrý jáne ótkizý jumystaryna 10 myńǵa tarta adam jumyldyryldy», - dep habarlady I.Tasmaǵambetov.
Ákim BAQ-tyń belsendi aqparattandyrýynyń arqasynda elimizdiń barsha turǵyndary merekelik sharalardy kóre alǵandyǵyn atap ótti.
Ákimniń aıtýynsha, Elorda kúnine arnalǵan is-sharalardy aqparattandyrýǵa 1 myńnan astam BAQ ókilderi tirkeldi, onyń 100-ge jýyǵy - sheteldik medıa-agenttikter.
Eske salaıyq, Astananyń 14 jyldyǵyna arnap uıymdastyrylǵan merekelik is-sharalarǵa satylǵan bıletterden 20 mln. teńge tústi. Qarajat dástúr boıynsha qaıyrymdylyq maqsatqa jumsaldy. Bıyl 25 múgedek atalǵan qarjyǵa em-dom alatyn boldy.
