Astana kúnine arnalǵan buqaralyq velojarys ótedi
ASTANA. QazAqparat - Elordada 2015 jyldyń 28 maýsymynda Astananyń 17 jyldyǵyna oraılastyrylǵan velojarys ótedi, dep habarlady Astana qalasy ákimdiginiń sporttyq-buqaralyq sharalar dırektsııasynyń baspasóz qyzmeti.
Shara tańerteńgi saǵat 10-00-de Saltanat saraıynyń aldyndaǵy alańnan bastalyp, «Astana-Arena» stadıonynyń aldynda márege jetedi. Baǵyttyń uzyndyǵy 4600 metr.
Velojarysqa elimizdi álemge tanytyp júrgen veloshabandozdar, belgili sportshylar, estrada juldyzdary, mádenıet qaıratkerleri, qoǵamdyq qurylymdardyń ókilderi qatysady. Dodaǵa Astana merekesin atap ótýge atsalysqysy kelgen barlyq azamattar, qala turǵyndary, qonaqtar qatysa alady. Velosıpedterdi jalǵa alýǵa bolady.
Kórermender men jarysqa qatysýshylarǵa arnap kontserttik baǵdarlama uıymdastyrylady. Baǵyt boıynda medıtsınalyq kómek kórsetý beketteri jumys isteıdi. Jeńimpazdar men belsendi qatysýshylarǵa arnaıy syılyqtar belgilengen.
