Astana kúninde qandaı sharalar uıymdastyrylady, kimder keledi?

Osy oraıda, «Astana aqshamy» gazetiniń tilshisi Aınur Sanabekqyzy astanalyqtardyń kókeıindegi «Bıylǵy toı nesimen erekshelener eken?» degen suraqty qalalyq Mádenıet basqarmasynyń bastyǵy Bolat Majaǵulovqa qoıdy. Suhbat basylymnyń búgingi sanynda jaryq kórdi.

«El bolyp asyǵa kútetin merekeniń biri  Astana kúni. Sondyqtan, ony uıymdastyrý da ońaı sharýa emes. Muny shaǵymdaný dep túsinbeńiz. Kerisinshe, elorda men el halqynyń kóńilinen shyǵatyn merekelik mázir usyný  basty mindet. Jyldar boıy qalyptasqan «Astana - arqaý» túrki mýzykasynyń festıvali, Esildegi «Áýen ózeni» balet keshi, «Myńjyldyqtar toǵysyndaǵy Astana» kóshpendiler órkenıeti festıvali, ekshn-fılmder festıvali jalǵasyn tabady. Oǵan qosa, elordanyń jer-jerinde buqaralyq saýyq ótetin bolady», - dep jazady tilshi.

- Basty suraǵymyzǵa kelsek, bıylǵy toı burynǵydan ózgerek bola ma?

-  Árıne. Birinshiden, bıyl Astana túrki áleminiń mádenı astanasy dep jarııalandy. Kindik qalanyń bıylǵy kúnindegi merekelik sharalardyń barlyǵy osy ataýly jyldyń aıasynda ótetin bolady. Túrki áleminiń mádenıetin pash etetin sharalarǵa ekpin túsirip otyrmyz.

Jalpy, bıylǵy toıdyń bazarlyǵy kóp. Ondaǵy negizgi sharalardyń deni ózimizdiń otandyq óner maıtalmandarynyń qatysýymen bolatynyn aıtýymyz kerek. Máselen, elordalyq teatrlar jańa qoıylymnyń tusaýyn kespek. Sondaı-aq, elimizdiń eki óńiri  Almaty men Atyraýdyń teatrlary gastrolmen keledi. Otbasylyq festıvaldarǵa da erekshe kóńil bólinip otyr. Sondaı-aq, «MýzART» tobynyń kontserti men belgili kompozıtor Erkesh Shakeevtiń jeke shyǵarmashylyq keshi ótedi. Odan bólek, KTK oıyndary, «Án júregim  Astana» gala-kontserti de kórermenderdi tánti etedi dep oılaımyz. Bıylǵy jyldyń basty artyqshylyǵy dep Qurmanǵazy eskertkishiniń ashylýyn aıtar edim. Mádenıet keńistigindegi murajaıdyń ornyn kórsetýdi kózdegen halyqaralyq forýmdy da osy sanatqa jatqyzýǵa bolady. Elorda kúninde ótetin sharalardyń barlyǵy qalanyń mádenı ahýalynyń damýyna serpin beredi dep aıta alamyn.

- Ár jyldary Astanaǵa dóńgelengen dúnıege aty málim dúldúlder kelip edi. Bıyl Astana jurty kimderdi kórip, kimderge qoshemet kórsete alady?

- Ol ras. Elordamyzǵa esimi álemge belgili Plasıdo Domıngo, Lara Fabıan, Sara Braıtman, Dmıtrıı Hvorostovskıı bastaǵan juldyzdar keldi. Qalyptasqan dástúr boıynsha bıyl da birqatar «men-men» degen ártister keledi. Máselen, qala turǵyndary Koreıanyń áıgili opera juldyzy Sýmı Djonyń kontsertin tamashalaı alady. Sondaı-aq, mánerlep syrǵanaýdan aldyna jan salmaıtyn reseılik Ilıa Averbýhtyń muz aıdynyndaǵy shoýy ótedi. Bárin aıta bersek, qalamyzdyń turǵyndaryna qyzyqsyz bolýy múmkin. Budan basqa da kóptegen syıymyz bar.

- Áńgimeńizge rahmet!