Astana kúninde bıletterden túsken 20 mıllıon teńge 25 múgedek balanyń emdelýine jumsalady - ákimdik
ASTANA. 9 shilde. QazAqparat - Astana kúninde bıletterden túsken 20 mıllıon teńge 25 múgedek balanyń emdelýine jumsalady,
dep habarlady Astana qalasy Bilim basqarmasynyń bastyǵy Ásıma Bımendına.
«Astana kúninde bıletterden túsken 20 mıllıon teńge múgedek balalardyń emdelýine baǵyttalady. 25 jetkinshek álemniń eń úzdik klınıkalarynda densaýlyqtaryn túzeýge múmkindik alady», - dep atap ótti ol, ákimdikte qamkóńil balalardyń ata-analaryna arnaıy aqshalaı sertıfıkattardy tabystaý rásimi kezinde.
«Astana qalasynyń múgedek balalar» qoǵamdyq birlestiginiń jetekshisi Qamqa Jasanovanyń aıtýynsha, elordada 1,5 myńǵa tarta múgedek bala bar.
«Olardyń barlyǵyna da qoǵamnyń kómegi men meıirimi qajet. Sondyqtan memleket tarapynan kórsetilip jatqan qamqorlyq olar úshin baǵalanbas dúnıe. Sońǵy 5 jylda Astana merekesinen túsken qarjy 50-den astam balanyń emdelýine múmkindik berdi», - deıdi Q. Jasanova.
Jylda ótkiziletin dástúrge jergilikti kásipkerler de óz úlesterin qosýda. 2008 jyly bıletterdi satýdan jáne qaıyrymdylyq sharalarynan 7,5 mln. teńge jınalǵan. Ol aqshaǵa múgedekterge arnalǵan «Qaısar» mamandandyrylǵan sport mektebine avtokólik pen múgedekterge arnalǵan 12 arba syıǵa tartylǵan bolatyn. 2009 jyly ota jasatý úshin 13 myń AQSh dollary 5 jasar Maksım Kýlıkovqa berildi. 2010 jyly qarajat 5 múgedek balanyń emdelýine jumsaldy. 2011 jyly 11 mln. teńge jınalyp, birneshe balǵynnyń ómirine arasha boldy.
