Astana kúninde Aqtóbede 30-dan astam nysan ashylady
Aqtóbede áleýmettik, óndiristik, saýda nysandary ashylady. Jobanyń jalpy quny - 10 mıllıard teńge. Jospar boıynsha 300-ge jýyq turaqty jumys orny ashylady. Aqtóbe oblysy ákimi baspasóz qyzmetiniń habarlaýynsha, óńirde táýligine 50-den 70 tonnaǵa deıin tátti taǵamdar shyǵaratyn «Aıs plıýs» JShS-niń balmuzdaq óndirý tsehy jumysyn bastaıdy. «Aqtóbe» ındýstrıaldy aımaǵynda jylyna 1 200 tonna ónim alatyn «PolıVest» JShS-niń polıetılen paket óndirý zaýyty iske qosylady. Sonymen qatar, Tuńǵysh Prezıdent atyndaǵy saıabaqta akvapark qoldanysqa beriledi. Bul nysandy salý týraly kelisim «AKTOBE INVEST-2016» halyqaralyq ınvestıtsııalyq forýmy kezinde jasaldy. Sol kezde oblys ákimdigi men «Ulan kompanııasy» JShS-i kelisimge qol qoıǵan bolatyn. Balalar jylyna oraı «Yurta Park» otbasylyq demalys saıabaǵy ashylmaq. Munda mınıgolf oınaıtyn alańqaı, ashyq aspan astyndaǵy kınoteatr, jasandy jartas, arqan baǵy, kitaphanalar, etnoaýyl men baılanys zoobaǵy, labırınt, muz aıdyny, planetarıı bolady.
Aıta keteıik, Astana kúni Aqtóbeniń aýdandarynda 8 sport jáne oıyn alańy, Áıteke bı aýdanynyń Araltóbe aýylynda 150 oryndyq stadıon, Keńqııaq aýylynda dárihana ashylyp, Hromtaý aýylynyń Dóń aýylynda 600 oqýshyǵa arnalǵan mektep paıdalanýǵa beriledi.
«Týǵan jerge taǵzym» aktsııasy aıasynda eldi mekenderdi abattandyrýǵa úlken mán beriledi. Elorda kúnine oraı aktsııa qatysýshylary men týǵan eline beı-jaı qaramaıtyn Aqtóbe oblysynyń týmalary ózderi týyp-ósken qala men aýyldarǵa Jambyl Jabaevtyń eskertkishin, birneshe stella, eki jańa gúlzar baǵyn, jylyjaı, sýburqaq jáne tennıs kortyn tartý etedi. Sonymen qatar, Qaraýylkeldi aýylynda shamamen 500 metrlik jaıaýjol men Baıǵanın aýdanynyń Jarqamys aýylynda qatty turmystyq qaldyqtar polıgony salyndy»,- dep habarlady oblys ákiminiń baspasóz qyzmeti.
Qobda aýdanynyń Terisaqqan aýylynda feldsherlik-akýsherlik pýnkt, al Bestaý aýylynda medıtsınalyq pýnkt ashylady. Bári memlekettik-jekemenshik seriktestik aıasynda salyndy. Jospar boıynsha Aqtóbe oblysynda Astananyń 20 jyldyǵyna oraı 430 myńǵa jýyq adamdy qamtıtyn 1200 qoǵamdyq-saıası, mádenı-buqaralyq is shara ótedi.
