Astana kúnin merekeleý kezinde saqtyq sharalaryna jaýapkershilikpen qaraǵan jón - Erjan Baıtanaev

NUR-SULTAN. QazAqparat - Astana kúnin merekeleý qarsańynda Sanıtarııalyq-epıdemıologııalyq baqylaý komıteti azamattardy saqtyq sharalaryn jaýapkershilikpen oryndaýǵa shaqyrdy, dep habarlaıdy QazAqparat.

Komıtettiń resmı ókili Erjan Baıtanaev kópshilikke adamdar jappaı jınalǵan oryndarda maska kııýdi, qoldy antıseptıktermen óńdeý men áleýmettik qashyqtyqty saqtaýdy usyndy.

«Sondaı-aq, ózińizdi jáne jaqyndaryńyzdy indetten qorǵaý maqsatynda árbir qazaqstandyq turǵynnan COVID-19-ǵa qarsy vaktsınatsııa men revaktsınatsııadan ýaqytyly ótýdi suraımyz. Aýrýdyń aldyn alýdaǵy eń tıimdi jol - vaktsınatsııa. Alaıda belgili ýaqyttan keıin ekpeniń qorǵanys kúshi tómendep, antıdeneler joıyla bastaıdy. Olardyń ınfektsııamen kúresýge jetkilikti deńgeıi saqtalýy úshin alty aıdan keıin revaktsınatsııadan ótý asa mańyzdy», - dedi komıtet ókili.