Astana kúni: Úsh kúndik mereke óz máresine jetedi

Sonymen uıymdastyrýshylar búgin de turǵyndar men astana qonaqtaryn, olardyń balalaryn jaıly, jarqyn saýyq-saıranǵa toly «Aınalaıyn» qalashyǵynda kóńilin kótere alady. Saǵat 10:00-den 22:00-ge deıin Stýdenttik saıabaǵynda («Qazaqstan» sport kesheniniń aýdany), «QazMunaıGaz» aldyndaǵy alańda, B. Momyshuly dańǵyly boıyndaǵy «Jeruıyq» saıabaǵynda, Astanalyq saıabaqta, qalalyq alańda, sondaı-aq «Jastar» saraıynyń alańynda úlken oıyn-saýyq baǵdarlamalary jumys isteıdi. Ol tek balalardy ǵana emes, ata-analardy da, apa-atalardy da, astana kúnine jınalǵan, balalyqpen qoshtasqysy kelmeıtinderdiń barlyǵyn da qýanyshpen qarsy alady.

Búgin aýyl sharýashylyǵy ónimderiniń jármeńkesiniń sońǵy kúni. Qalalyqtar búgin qajetti azyq-túlikterdi ortasha naryqtyq baǵadan 15-20 paıyzǵa tómen satyp alýǵa múmkindigi bar. Saǵat 10:00-den bastap qalanyń úsh aýdanynda, Abylaı han dańǵyly boıynda, Esil aýdandyq halyqqa qyzmet kórsetý ortalyǵy jáne «Shapaǵat» bazary aýmaqtarynda uıymdastyrylǵan óndirýshilerdiń baǵasymen aýyl sharýashylyǵy ónimderiniń jármeńkesi ótedi. Jármeńkege Astananyń jáne Aqmola men Qaraǵandy oblystarynyń 60-tan astam taýar óndirýshileri qatysady.

«Myńjyldyqtar toǵysyndaǵy Astana» kóshpeliler órkenıetiniń festıvali búgin aıaqtalady. Alaıda saǵat 11:00-den bastap Astanalyq saıabaqta kórermen nazaryna kóńildi baǵdarlamalar, «Sazgen sazy» folklorlyq-etnografııalyq ansambldiń, qazaq ınstrýmentaldyq mýzykasynyń, «Qońyr» etno-tobynyń kontsertteri, «Jyr-termeler» epıkalyq mýzykalyq baǵdarlamalar usynylady, sonymen qatar etnoaýyldardan túrli kádesyılar satyp alýǵa múmkindik bar.

Al saǵat 12-de Kongress-holl saraıynyń aldyndaǵy alańda balalarǵa arnalǵan «Balalar araly» atty baǵdarlama ótedi. Astana qalasynyń qurdastarynyń arasynda ótkiziletin «Astananyń kishkentaı sultany - 2010», «Astananyń kishkentaı arýy -2010» IX qalalyq baıqaýy eń tanymal ári qyzyqty balalar jobasynyń birine aınaldy. Atalmysh jobaǵa qatysýshylar men jeńimpazdardy saltanatty marapattaý rásiminde olarǵa baǵaly syılyqtar tabystalady.

Sonymen qatar dál osy ýaqytta qalalyq alańda «Aspazdardyń sheberligi - súıikti qalaǵa» atty aspazdyq jármeńkeniń jeńimpazdary anyqtalady. Úsh kúnniń ishinde Astananyń ataqty meıramhanalary, dámhanalary men aspazdyq oryndary qazylar alqasy men halyqtyq sarapshylarǵa ártúrli ulystardyń ashanalary men ózderiniń fırmalyq taǵamdaryn usynady. Aspazshylardyń arasynan eń úzdigin anyqtaýǵa kez kelgen zaýyqty adam qatysa alady.

Jastar úshin jeke baǵdarlama ázirlengen. Saǵat 12-de «Astana mega ortalyǵy» saýda oıyn-saýyq ortalyǵynyń alańynda «Ekstrım tolqyny» atty kóńildi shoý ótedi. Jarysqa Astana, Qaraǵandy, Kókshetaý, Temirtaý qalalarynan kelgen 8 úzdik breık-danys ujymy, parkýr boıynsha Qazaqstannyń 12 úzdik komandasy, skeıtbordıng pen rollıngtiń 15 mamany qatysady.

Ózin sýretshi retinde baǵalap kórýge kez kelgen azamattyń múmkindigi bar. Olardy Esil ózeniniń jaǵalaýynda Qazaqstan sýretshileriniń «Astananyń jas kelbeti» pleneri kútedi.

Astanalyq tsırkte «Azııa jańǵyryǵy» atty tsırk óneriniń Halyqaralyq festıvali búgin aıaqtalady Festıval baǵdarlamasynda úndi pilderi, ýssýrıı jolbarystary, afrıkalyq arystandar, túıeler, attar, sondaı-aq Kenııa men Qytaıdan kelgen ártisterdiń biregeı akrobatıkalyq kórinisteri, áýede óner kórsetetin ártister jáne saıqymazaqtardyń ónerleri kórermen nazaryna usynylady. Mádenı is-sharaǵa qatysýshylardyń arasynda Máskeý, Qytaı, Latyn Amerıkasy, Monte-Karloda ótken halyqaralyq baıqaýlardyń júldegerleri men laýreattary bar.

Saǵat 17.00-den 21.00-ge deıin Baýyrjan Momyshuly atyndaǵy saıabaqta «International street dance session» in Astana shoýynyń qorytyndy kezeńe ótedi. Astana qalasynyń turǵyndary men qonaqtary túrli baǵyttar men stılge bólingen kóshe mádenıeti saıystarynyń kýágeri bola alady.

Astana qalasynyń 12 jyldyq mereıtoıyn toılaý baǵdarlamasyna sáıkes, amerıkalyq tanymal oryndaýshylar Nıkol Genrı jáne Kımberlı Devıstiń qatysýymen djaz keshi ótpek. Olardyń árqaısysy jeke oryndaýda óner kórsetkenimen, bir kontsert alańynda kezdeskende juptasa djaz oryndaýdan bas tartqan emes. Nıkol men Kımberlıdiń birlesken shyǵarmashylyq ónerlerin búgin saǵat 18:00-de Beıbitshilik jáne kelisim saraıynda tamashalaýǵa múmkindik bar.

Saǵ. 18:00-de mıllıondaǵan tyńdarmandardyń súıikti ánshisi, postkeńestik keńistiktegi eń tanymal oryndaýshylardyń biri, Reseıdiń eńbek sińirgen ártisi Aleksandr Serov Astana tórindegi «Qazaqstan» ortalyq kontsert zalynda án shyrqaıdy. «Qazaqstan» ortalyq kontsert zalynda «Madonna», «Mýzyka venchalnaıa», «Ty menıa lıýbısh», «ıA lıýblıý tebıa do slez» syndy halyqtyń júreginen oryn alǵan qaıtalanbas oryndaýdaǵy tamasha týyndylar shyrqalatyn bolady. Al roıaldiń tizgini án avtory - Igor Krýtoıdyń enshisinde.

Al 20:00-de «Astana-Arena» alańynda qazaqstandyq, reseılik jáne shet el estrada juldyzdarynyń qatysýymen «Asqaqtaı ber, Astana!» kontserti ótkiziledi. Qazaqstan, Reseı, shet eldiń tanymal juldyzdary óner kórsetetin ǵajaıyp gala-kontsert qala kúnine oraı alǵash ret uıymdastyrylyp otyrǵan joq. Alaıda atalmysh kontsert astanalyq jastar men mereke qonaqtarynyń kópke deıin esinde qalady dep josparlanýda. Merekelik kontsertke asyǵa kelgen qala turǵyndary men qonaqtary tórt saǵat boıy tanymal oryndaýshylardyń áıgili ánderin tamashalaıtyn bolady. Kontsert qonaqtary - otandyq estradanyń tanymal ártisteri men álemdik hıt-paradtardyń aldyńǵy shebin ıemdengen shet el juldyzdary. Bıylǵy jyly Astananyń týǵan kúni merekesiniń qonaqtary esebinde Sergeı Lazarev, «Gorod 312» toby men «In-ıAn», «A'Stýdıo» shaqyryldy. Qazaqstandyq tyńdarmandar tanymal oryndaýshy r&b Ne-Yo men Morandi syndy áıgili toptyń ónerine Astana tórinde kýá bolady. Álemge áıdik ánshilerdiń merekelik shashýy esten ketpes naǵyz juldyzdy sátke aınalady dep kútilýde.