Astana kúni taıqazanǵa 700 keliden astam et asylyp, rekordtyq kórsetkishke qol jetkizilmek
ASTANA. QazAqparat - 6 shilde kúni saǵat 12.00 «Han Shatyr» saýda, oıyn-saýyq ortalyǵynyń aldyndaǵy Ǵashyqtar saıabaǵynda 3 jylqynyń eti asylady. Bul tartýdy Astana kúnine oraı Qazaqstan halqy Assambleıasy men Qazaqstan geografııalyq qoǵamy birlesip jasamaq, dep habarlanǵan Astanadaǵy merekelik is-sharalardyń resmı saıtynda.
Ol úshin saıabaqqa arnaıy taıqazan ornatylady. Erekshe ataý berilgen «Taıqazan» aktsııasyn uıymdastyrýshylardyń maqsaty - qazaqtyń meıirbandyǵy men qonaqjaılylyǵyn taǵy da bir márte tanytý, bereke men tatýlyq - eldiktiń tuǵyry ekenin pash etý.
Sharany uıymdastyrýshylar 700 keliden astam jylqy etin asý arqyly Gınnesstiń rekordtar kitabyna enýdi maqsat etip otyr. Ol úshin Londonnan Gınnesstiń rekordtar kitaby uıymynyń bas keńsesinen arnaıy mamandar keledi. Ázirlengen etten 3,5 myńnan astam adam dám tatyp, tabaqtas bola alady.
