Astana kúni merekesi jalǵasýda

Tańǵy saǵat 10:00-den elordanyń barlyq saıabaqtarynda, skverlerinde qala halqy men qonaqtarynyń kóńil kóterýine múmkindik beretin is-sharalar ótedi. Uıymdastyrýshylar qalalyqtar men Astana qonaqtaryna taqyryptyq baǵyttar boıynsha bólingen 5 ınteraktıvti joba usynady. «Sport jáne men» sporttyq jarystaryn qyljaqbas-anımatorlar júrgizedi. Munyń barlyǵy sahnadaǵy tsırk ártisteri jáne mýzyka men bı ujymdarynyń qatysýymen ótedi. «Balalyqtyń sıqyrly eli» merekelik sharasy Qarjy mınıstrligi aldyndaǵy skverde balalardy ertegilik qoıylymdar, jarqyn tsırk baǵdarlamasy, sondaı-aq baıqaýlar, oıyndarymen kútedi. «Astanany jyrlaımyz» baǵytynda Astana turǵyndaryna arnaıy kontserttik baǵdarlamany Stepnogor qalasynyń turǵyndary ázirlegen. «Juldyzy jarqyraǵan - Astana» baǵdarlamasynda «Shattyq» balalar shyǵarmashylyq festıvali túrindegi balalar ujymynyń, jas ártister men mýzykanttardyń oryndaýyndaǵy ulttyq shyǵarmashylyq usynylady. «Qazaq dastany» jobasynda jas ártister men mýzykanttardyń oryndaýynda qazaq halqynyń ulttyq shyǵarmashylyǵy, respýblıkada turatyn ártúrli ulttardyń ádep-ǵuryptary kórsetiledi.

«Dáýlet» sportkombınatynda saǵat 10:00-de «Altyn saqa» ulttyq asyq atý oıyny boıynsha ІІ ashyq qalalyq týrnır bastalady. Astana turǵyndary men qala qonaqtary Qazaqstannyń sporttyq jylnamasynda ekinshi ret ótkizilip jatqan osy naǵyz halyqtyq oıyndy tamashalaýǵa múmkindik alady. Týrnırdi ótkizý aıasynda qatysýshylar men kórermender arasynda asyq atý oıyny boıynsha ádisteme quraly taratylady.

Sondaı-aq búginde «Astana - shattyq» avtokerýeni kontserttik baǵdarlamamen elordanyń Kóktal, Óndiris, Jeleznodrojnyı, Mıchýrın jáne Ilınka eldi mekenderin aralaýdy odan ári jalǵastyrady.

Keshe aýyl sharýashylyǵy óninmderiniń jármeńkesine bara almaǵan qalalyqtar búgin qajetti azyq-túlikterdi ortasha naryqtyq baǵadan 15-20 paıyzǵa tómen satyp alýǵa múmkindigi bar. Saǵat 10:00-den bastap qalanyń úsh aýdanynda, Abylaı han dańǵyly boıynda, Esil aýdandyq halyqqa qyzmet kórsetý ortalyǵy jáne «Shapaǵat» bazary aýmaqtarynda uıymdastyrylǵan óndirýshilerdiń baǵasymen aýyl sharýashylyǵy ónimderiniń jármeńkesi ótedi. Jármeńkege Astananyń jáne Aqmola men Qaraǵandy oblystarynyń 60-tan astam taýar óndirýshileri qatysady.

Abaı eskertkishiniń janynda saǵat 11:00-de «Ulttyq rýh, eldik sana, nurly Astana!» dep atalatyn kitap pen poezııa merekesi ótedi. Jyl saıyn dástúrli túrde Qala kúni qarsańynda ótkiziletin Kitap festıvaliniń basty maqsaty - Qazaqstannyń aqyn-jazýshylarynyń shyǵarmashylyǵyn keńinen nasıhattap, urpaqty ultjandylyqqa, otansúıgishtikke tárbıeleý. Merekelik is-shara qazaq ultynyń tarıhy men salt-dástúrine qurylǵan «Meniń elim» oıyn-saýyq suraq-jaýap saıysymen jalǵasyn tabady. Suraq-jaýap saıysy teatrlandyrylǵan sahna úlgisinde júrgiziledi. Al jeńimpazdar kádesyılarymen marapattalady.

Saǵ. 11.00 Astanalyq saıabaqta «Myńjyldyqtar toǵysyndaǵy Astana» kóshpeliler órkenıetiniń festıvali ótkiziledi. Astananyń 10 jyldyǵyna oraı uıymdastyrylǵan atalǵan festıval kópshilik tarapynan qyzyǵýshylyq týǵyzyp, mereke kúnderi barsha qala turǵyndarynyń nazaryn aýdartqan edi. Sondyqtan sharany uıymdastyrýshylar bul festıvaldi jyl saıyn ótkizýdi dástúrge aınaldyrǵan. Festıval kóshpeliler órkenıetiniń erekshelikterin, qala men dala mádenıeti, keshegi men búgingi syndy qarama-qaıshylyqtardyń birligin tamasha úılestire bildi. Bıylǵy jyly festıval baǵdarlamasyna «Kóne qala - Buzoq», «Qymyz ortalyǵy», «Ázil-ospaq saıysy», «Altybaqan» aıasyndaǵy jastar keshi» jáne basqa da jańa merekelik sharalar qosyldy. Úsh kúnge sozylatyn festıval qyzyqty sharalarǵa qanyq. Osy kúnderi han shatyry poshymynda kóterilgen basty sahnalyq alańda dáýlesker kúıshiler túrki áýenderin kúmbirletedi. Baǵdarlama aıasyna «Kóshpendiler kókjıegi» degen atpen aqyndar aıtysy engizilgen.

Shildeniń 4-i men 6-sy aralyǵynda ótetin aspazdyq festıvali de kelýshilerdi kútedi. Úsh kúnniń ishinde Astananyń ataqty meıramhanalary, dámhanalary men aspazdyq oryndary qazylar alqasy men halyqtyq sarapshylarǵa ártúrli ulystardyń ashanalary men ózderiniń fırmalyq taǵamdaryn usynady. Aspazshylardyń arasynan eń úzdigin anyqtaýǵa kez kelgen zaýyqty adam qatysa alady.

Sondaı-aq «TsÝM» SO, «Megatsentr Astana» SOO, «Saryarqa» SOO, «Kerýen» SOO, «Asia Park» SOO jáne basqa da saýda úıleri men sýpermarketterde ári qalalyq alańda birneshe aktsııa ótkiziledi. Bul kúnder ádettegideı dúken aralaýdan múlde erekshe bolmaq. Sebebi saýda ortalyqtarynda túrli kórmeler, satylymdar, ulttyq taǵamdar kórsetilimi jáne lotereıa oıyndary uıymdastyrylyp, merekelik jeńildikter jasalady.

Saǵat 15.00-de «Báıterek» kesheniniń alańynda jáne Esil ózeniniń jaǵalaýynda «Astana jáne Prezıdent» fotokórmesi jáne Qazaqstan sýretshileriniń «Astananyń jas kelbeti» pleneri ótedi. «Báıterek» kesheniniń ekspozıtsııalyq keńistigi 100-ge deıin fotojumys qoıýǵa múmkindik beredi. Kásibı fotosheberler kórmesi muraǵattyq fotomaterıaldardan jáne Astana qalasynyń kásibı fotosheberleri I.Býrgandınovtyń, V.Fedıýnınnyń, N.Imamovtyń, Sh.Barmanqulovtyń, V.Leşenkonyń jumystarymen tolyǵa túsken.

Qazirgi orys barıtondarynyń úzdigi, opera juldyzy Dmıtrıı Hvorostovskıı men tanymal kompozıtor Igor Krýtoıdyń kontserti de osy kúni saǵat 15-te «Qazaqstan» ortalyq kontsert zalynda ótedi.

Astanalyq tsırkte «Azııa jańǵyryǵy» atty tsırk óneriniń Halyqaralyq festıvali odan ári jalǵasady. Festıval baǵdarlamasynda úndi pilderi, ýssýrıı jolbarystary, afrıkalyq arystandar, túıeler, attar, sondaı-aq Kenııa men Qytaıdan kelgen ártisterdiń biregeı akrobatıkalyq kórinisteri, áýede óner kórsetetin ártister jáne saıqymazaqtardyń ónerleri kórermen nazaryna usynylady. Mádenı is-sharaǵa qatysýshylardyń arasynda Máskeý, Qytaı, Latyn Amerıkasy, Monte-Karloda ótken halyqaralyq baıqaýlardyń júldegerleri men laýreattary bar.

Saǵat 17.00-den 21.00-ge deıin Baýyrjan Momyshuly atyndaǵy saıabaqtaǵy amfıteatr tamasha merekelik baǵdarlamanyń alańyna aınalmaq. Bul kúnderi saıabaqta «International street dance session» in Astana shoýy ótkiziledi. Astana qalasynyń turǵyndary men qonaqtary túrli baǵyttar men stılge bólingen kóshe mádenıeti saıystarynyń kýágeri bola alady. Shoý-baǵdarlama qatysýshylarynyń sheńberi keń. Bul tamasha baǵdarlamada Qyrǵyzstan, Reseı, Belorýs, Ýkraına, Ózbekstan jáne Qazaqstanyń barlyq aýmaqtarynan at aryltyp kelgen bı ujymdary óz ónerlerin kórsetedi.

Saǵat 19.00-de K. Baıseıitova atyndaǵy Ulttyq opera jáne balet teatrynda, sonymen birge Astanalyq saıabaqta «Astana - Arqaý» túrki mýzykasynyń festıvali ótedi. «Astana-Arqaý» festıvaliniń kontsertinde attary óz elderinen tys jerlerde belgili joǵary deńgeıdegi sheberlerdiń oryndaýynda túrki halyqtarynyń barlyǵyna jýyǵynyń mýzykasy usynylady. Joǵary baǵalanatyn jáne Batys pen Shyǵys tyńdaýshylaryn tań qaldyratyn shamandyq án oryndaý, shańqobyzǵa arnalǵan vırtýozdyq qurylymdar, kómeımen án salý, epıkalyq jáne aspaptyq qurylymdar, Orta Azııa men Qazaqstan, Qap taýy men Anadoly, Edil boıy men Sibir túrkileriniń áýen saryny oryndalady. Ártúrli stıl men mazmundaǵy, onyń ishinde ejelgi táńirlik kózqaraspen, ıslam qundylyǵymen jáne HH ǵasyr shyndyǵymen baılanysty áýender oryndalady.

Astanalyqtardyń súıikti baǵdarlamasyna aınalyp úlgergen «Ózen áýeni» klassıkalyq mýzyka keshi ádettegideı Esil ózeniniń jaǵalaýynda saǵ. 21.00-de ótkiziledi. Baǵdarlamanyń ekinshi kúninde kórermender eki aktili «Jızel» baletin tamashalaýǵa múmkindik alady.

Saǵat 21:00-den bastap «Stýdenttik» saıabaqta, «Báıterek» monýmenti aldyndaǵy alańda, sondaı-aq qalalyq alańdarda «Qaıyrly kesh, Astana!» merekelik baǵdarlamasy qanat jaıady jáne zamanaýı qazaqstandyq mýzykasyn qadir tutatyndar men tyńdaıtyndarǵa ǵajaıyp án álemine shomýǵa múmkindik beredi. Turǵyndar men mereke qonaqtaryna merekelik kóńil-kúı qalyptastyrý úshin qazaqstandyq oryndaýshylar olarǵa jandy daýyspen eki saǵattyq kontsert beredi. Olardyń jeke jáne qosylyp oryndaýlarynda zamanaýı hıttar, sonymen qatar ótken jyldardyń ánderi aıtylady. Kórermenderdiń nazaryna saýatty stıldegi retro-ánder usynylady.

Astana merekesiniń ekinshi kúni QR Prezıdenti Nursultan Nazarbaevtyń qatysýymen «Han Shatyr» saýda oıyn-saýyq ortalyǵynyń ashylý saltanaty ótedi. Ashylý rásimi saǵat keshki 10-da bastalyp, elimizdiń barlyq shyǵarmashylyq ujymdarynyń qatysýymen qazaq halqynyń mádenıetin, bolmysyn kórsetetin «Kóshpendiler» teatrlandyrylǵan 35-40 mınýttik sherý ótedi. Osydan keıin ulttyq mádenı ortalyqtardyń bı ujymdary men balet ártisteri daıyndaǵan 15 mınýttik «Kún adamdary» qoıylymy usynylady. Baǵdarlamanyń kelesi bólimi esimi álemge áıgili tanymal jáne klassıkalyq ánderdi naqyshyna keltire oryndaýshy Andrea Bochelıdiń kontsertine ulasady.