Astana kúni keń kólemde atalyp ótti
ASTANA. QazAqparat - 6 maýsym kúni Astananyń týǵan kúni barsha elimiz boıynsha keń kólemde atap ótildi. Shýaǵyn tókken nurly kún, áýelegen áýender, kúmbirlegen kúıler, shattyqtaı bal-bul janǵan júzder, sábılerdiń qýanyshqa toly tátti kúlkisi, sahnada myń buralǵan bı qyzdardyń óneri, palýandardyń saıystary, ulttyq oıyndar, aqyndardyń shabytty jyrlary...bári-bári Astanamyzdyń kelbetin odan saıyn ajarlandyryp, merekeni tamashalaýǵa kelgen jurtshylyqtan ortalyq alańdarda ıne shanshar oryn bolmady.
Iá, Elordamyz bıyl 18 jasqa toldy. 18 degen er-azamattyń jigittik shaǵy. Armanmen astasqan, jigerli ári qaıratty shaq. Astanamyz da erkin adymdap, qanaty qataıyp, nyq senimmen alǵa basýda. Endigi maqsat - budan da bıik belesterdi baǵyndyrý. Týǵan halqymen, elimen birge ósip, kórkeıý.
Elbasy jýyrda Astana týraly sóılegen sózinde: «Osy ýaqyt ishinde úlken joldy artqa tastadyq, kóp nárse jasaldy, biraq jasaıtynymyz áli de kóp. Biz buǵan daıynbyz, ol úshin qajetti múmkindikter men qulshynys bar. Astana bizdiń táýelsizdigimizdiń, damýdyń shynaıy kórinisine, azattyq pen ınnovatsııa rýhyna aınaldy. Qazaqstandyqtar úshin jańa elorda, bul - Otanymyzdyń júrekke jaqyn, tartymdy ortalyǵy» degen bolatyn. Shyn sóz.
Endi sózimizdi Astana kúnine baılanysty sharalarmen túıindesek. Ol ádettegideı san túrli festıvaldermen, óner jáne án keshterimen órnekteldi.
Máselen, «Myńjyldyqtar toǵysyndaǵy Astana» festıvali elorda turǵyndary men qonaqtaryn kóshpeliler órkenıetimen tanystyrsa, Oqýshylar saraıynda IV «Aıalaǵan Astana - 2016» respýblıkalyq konkýrsy óz máresine jetip, úzdikter anyqtalyp jatsa, jastar úshin taǵylymy mol shara dep Abaı eskertkishiniń janynda ótkizilgen ádebı sharanyń orny bólek boldy. Bıylǵy shara barysynda F.Ońǵarsynovanyń «Óleńder jınaǵy» kitabynyń tusaýkeseri ótkizilip, «Abaıdyń rýhy» atty teatrlandyrylǵan qoıylym kórsetilgeni de erekshe este qaldy.
Bıylǵy jyldyń jańalyǵy, elorda qonaqtary amerıkalyq jáne otandyq 80 artıstiń ashyq aspan astyndaǵy sahnada Brodveılik mıýzıklin tamashalady. «Báıterek» monýmentiniń aldyndaǵy alańdaǵy keshki qoıylym Elorda kúnine jáne Qazaqstan Respýblıkasy men Amerıka Qurama Shtattarynyń arasyndaǵy yntymaqtastyqtyń 25 jyldyǵyna oraılastyryldy. Qalalyq alańda «Táýelsizdik jyry - Astana» fotokórmesi ótti. Kórmege belgili fototilshilerdiń, Reseı Sýretshiler odaǵy músheleriniń jáne t.b. eńbekteri qoıyldy. Kópshilik nazaryna 300-ge jýyq jumys usynyldy. Sonymen birge «Qazaq Eli» monýmentiniń aldyndaǵy alańda «Arqaıym - kúnniń qalasy» 3D ınteraktıvti oıyn-saýyq qalashyǵy ashylyp, halyqtyń kózaıymyna aınaldy. Qalalyq alańda «Aspazshylar sheberligi - súıikti qalaǵa» atty tórtinshi aspazshylar festıvali de qyzyqty ótti. Óıtkeni munda úzdik daıashy anyqtaldy. Úsh metrlik merekelik torttyń janyna sýretke túsýshiler legi tolastamady. Qalalyq saıabaqtar da bul kúni erekshe ásemdikke bólendi.
Joǵaryda aıtqanymyzdaı, Elorda toıy respýblıka boıynsha toılandy. Bul búginde jaqsy dástúrge aınalǵany belgili. Máselen, Almatydaǵy Mádenıet jáne demalys ortalyq saıabaǵynda «Astana - Otanymyzdyń júregi, Táýelsizdigimizdiń tiregi» atty aýqymdy merekelik kontsertke ónersúıer qaýym kóp jınaldy. «Astana-Almaty poıyzy» baıqaýy jáne basqa da birqatar sporttyq sharalarda tartysty jarystar uıymdastyryldy. Respýblıka Saraıy aldyndaǵy alańda jalpyqalalyq kontsert keremet deńgeıde ótti. Qaraǵandy, Shyǵys Qazaqstan, Qostanaı, Atyraý, Aqtóbe, Batys Qazaqstan, Qyzylorda, Jambyl, Soltústik Qazaqstan, Mańǵystaý, Almaty oblystarynda da Astana kúni dúbirli toı kórinisterimen aıshyqtaldy. Týǵan kúniń qutty bolsyn, Astana!
