Astana kúni qarsańynda sý kóligin baqylaý ınspektsııasynyń qyzmeti kúsheıtilgen tártipke kóshiriledi
ASTANA. 27 maýsym. QazAqparat - QR Kólik jáne kommýnıkatsııa mınıstrliginiń Kóliktik baqylaý komıteti, Astana qalasynyń ákimdigi, Іshki ister departamenti,
TJD sýda qutqarý qyzmeti, «Esil -Astana» MKQK ókilderiniń jáne qaıyqtardy jalǵa berý stansalary ıeleriniń qatysýymen ótken jınalysta mereke jáne demalys kúnderi Astana qalasyndaǵy Esil ózeninde kemelerdi paıdalanýdyń qaýipsizdigin arttyrýdy qamtamasyz etý máselesi qaraldy.
Basqosýda Esil ózeninde sý kólikterin qoldaný qaýipsizdigin qamtamasyz etýdiń is-sharalary da ázirlendi.
Atap aıtqanda, Astana qalalyq ishki ister departamentine qalalyq jaǵajaı, jaıaý júrginshilerge arnalǵan kópir sekildi turǵyndar men qala qonaqtary kóp jınalatyn jerlerde qoǵamdyq tártipti qamtamasyz etý máselesin sheshý usynyldy. Al, sý kóligi arqyly jolaýshy tasymalyn júzege asyryp júrgen «Esil - Astana» MKQK-ne qalalyq ákimdikpen birlese otyryp, jolaýshylardyń kemege otyrý jáne túsý qaýipsizdigin qamtamasyz etý tapsyryldy.
Budan basqa, QR KKM Kóliktik baqylaý komıtetimen ózenderge arnalǵan shaǵyn kemeler men qaıyqtardy jalǵa berý stansalarynyń ıeleri arasynda kemelerdi qoldanýda qaýipsizdik talaptaryn qatań saqtaý qajettigi jóninde túsindirme jumystary júrgizildi. Búgingi kúni elordada ózenge arnalǵan 36 keme men 277 shaǵyn keme tirkelgen.
Munyń syrtynda, Astana qalasy boıynsha óńiraralyq «Saryarqa» kóliktik baqylaý ınspektsııasy «Esil -Astana» MKQK-nyń jolaýshylar tasymaly úshin qoldanyp júrgen kemeleriniń qaýipsizdik talaptaryna qanshalyqty saı ekenine tekserý júrgizdi. Búgingi kúni barlyq shaǵyn kemeler tehnıkalyq kýálandyrýdan ótken, dep habarlandy Kólik jáne kommýnıkatsııa mınıstrliginiń baspasóz qyzmetinen.
