Astana kúni qarsańynda óner súıer qaýym ataqty «Baqshasaraı burqaǵy» baletin tamashalaı alady
ASTANA. QazAqparat - Sáýirde ótken B. Asafevtiń «Baqshasaraı burqaǵy» baletiniń tusaýkeserine úlgermegen jandar horeografııanyń asa kórnekti jaýharyn Astana kúni qarsańynda 27 maýsymda jáne 3 shildede tamashalaı alady. «Astana Opera» teatrynyń Úlken zalynda basty keıipkerler - qyzǵanshaq Zarema, sezimtal Marııa jáne Gereı han arasynda laýlaǵan qushtarlyq oty baıandalady, dep habarlaıdy atalǵan teatrdyń baspasóz qyzmeti.
Kordebalet ártisi Jánibek Imanqulov Gereı partııasyn alǵash ret somdaıtynyn atap ótý kerek, ol buǵan deıin B. Eıfmannyń «Roden» baletinde bas partııany oryndaǵandyqtan bul onyń «Astana Opera» sahnasyndaǵy alǵashqy salmaqty róli emes, al Marııa partııasyna daıyndalyp jatqan jas ta daryndy Nazerke Aımuhametova úshin bul elordalyq sahnaǵa shyǵatyn asa jaýapty kún bolmaqshy.
- Bul barlyq «pa» múltiksiz oryndalýy tıis aıtarlyqtaı kúrdeli partııa. Munymen qatar meniń keıipkerim kóz jumady, olaı bolsa, kórermen bar qaıǵyny sezinetindeı jaqsy akterlyq sheberlik, zor emotsııa qajet, - deıdi ártis.
Qazaqstandyq horeograftardyń qoıylymyna ónertaný ǵylymdarynyń kandıdaty, A.ıA. Vaganova atyndaǵy orys baleti akademııasynyń dotsenti Olga Rozanova baǵa berdi. Óziniń «Tamasha ańyz... Tamasha balet...» atty maqalasynda synshy bylaı dep jazady: «1934 jyly V. Hodasevıch óte jaqsy kórkemdegen jáne sol stsenografııamen kúni búginge deıin Marıınskıı teatrynda qoıylyp kele jatqan spektaklmen salystyrǵanda qazaqtyń «Burqaǵy» anaǵurlym ózgeshe ári jaqsy».
Ónertanýshy Zarema partııasyn oryndaıtyn balettiń jetekshi solısteriniń sheberligin erekshe atap ótti.
- Bul jerde bıdiń asqan sheberligin meńgergendigiń jetkiliksiz, keıipkerdiń ómirin óz basyńnan keshýiń kerek, onyń jan qaıǵysyn kórsetý qajet, melodramalyq ásireleýden boıyńdy aýlaq ustap, mahabbat pen úmitke degen yntyqtan bastap, qajý men qasarysýǵa deıin aparatyn sezimderdiń kúrdeli jıyntyǵyn jetkizý kerek. Bir sózben aıtqanda, balerına naǵyz aktrısa bolýy qajet. Bul talantty prımalar - Áıgerim Beketaevanyń jáne Gaýhar Ýsınanyń qolynan keldi.
Sıýjetke A.S. Pýshkınniń «Kóz jasynyń burqaǵy» dep te atalatyn kóne ańyzdyń negizinde jazylǵan attas poemasy negiz bolǵan. Tatardyń qatigez qolbasshysy Gereı han Polshada soıqan salady. Kezekti shapqynshylyq kezinde ol áskerimen kelip, knıaz qyzy Marııanyń týǵan kúnine oraı ótip jatqan saltanatty keshte polshalyq qamaldy basyp alady. Jergilikti halyqty qyryp salǵan Gereı han Marııany kórgende essiz ǵashyq bolady. Sulýlyǵy kún nurymen talasqan názik tutqyndy Baqshasaraıǵa alyp keledi, sol jerde Marııa Gıreıdiń súıikti jubaıy - Zaremaǵa kezigedi. Gereı han bolsa Marııadan ózin unatýdy jalynýmen bolady, jas qyz salqynqandylyq tanytady. Úlken basy kishireıgen Gereı han ketken kezde, jatatyn bólmege Zarema keledi. Ol hannan bas tartýdy talap etse, Marııa Gereıdi eshqashan súıe almaıtynyn túsindirýge tyrysady. Alaıda Marııanyń bólmesinen hannyń umytyp ketken taqııasyn kórgen Zaremanyń qyzǵanyshy basyna shaýyp, jas qyzdy óltirip qoıady. Gereı handy jubatý múmkin emes edi.
