Astana kúni qarsańynda Qazaqstan Prezıdentiniń ómiri jaıly sahnalyq qoıylym bolady
ANA. 6 maýsym. QazAqparat /Gúlmıra Álıakparova/ - Astana kúni qarsańynda óner súıer qaýymǵa Qazaqstannyń Tuńǵysh Prezıdenti týraly qoıylym usynylady.
Bul týraly Astanadaǵy merekelik is-sharalardyń resmı saıtynda habarlandy.
N.Nazarbaevtyń ómirbaıany jaıynda syr shertetin «Tereń tamyrlar» qoıylymyna daıyndyq osy kúnderi Q.Qýanyshbaev atyndaǵy qazaq mýzykalyq-drama teatrynda júrip jatyr. «Tereń tamyrlar» -bizdiń ótkenimiz ben búgingimizdiń baılanysy. Qoıylym Prezıdentimizdiń ómiri men qaıratkerligi, onyń búginge deıingi qyzmettik ósý joldary týraly syr shertedi», - deıdi qoıylym rejısseri Nurlan Jumanııazov.
Al akter Shah-Murat Ordabaev: «Bul qoıylym bizdiń táýelsiz elimizdiń Prezıdentiniń ómiri týraly. Onda Prezıdenttiń el damýyna oń áser etetin shuǵyl sheshimderdi qalaı qabyldaıtyny, sonyń nátıjesinde bizdiń 20 jylda qol jetkizgen jetistikterimiz týraly aıtylady. Qazaqstan - qarqyndy damyp kele jatqan el. Shet el bizdi biledi jáne syılaıdy, asa damyǵan elder bizben áriptes jáne bizdiń damýymyz munymen toqtap qalmaıdy. Táýelsizdik degenimiz jaı ǵana sóz emes, ol bizdiń Qazaqstanymyz, bizdiń halqymyz, bizdiń tarıhymyz. Biz ony maqtan etemiz», - dep qoıylym sıýjeti týraly óz oıymen bólisti.
Elordalyqtar men qala qonaqtary qoıylymdy 2 shilde kúni saǵat 17:00-de K.Baıseıitova atyndaǵy Ulttyq opera jáne balet teatrynda kóre alady.
