Astana kúni qarsańynda qala teatrlarynda birneshe qoıylymnyń tusaýkeseri ótedi
ASTANA. QazAqparat - Qala kúni merekesine qarsy Astana teatrlarynyń akterlary men rejısserleri maýsym boıy tamashalaýǵa turarlyq qoıylymdardyń tusaýkeserlerin daıyndady.
Bul týraly Astana qalasynyń 16 jyldyǵyna arnalǵan merekelik sharalardy daıyndaý jáne ótkizý jónindegi uıymdastyrý komıtetiniń medıa-shtaby habarlaıdy.
Mereke kúnderiniń qarsańynda teatrsúıer qaýymdy kelesi tusaýkeserler kútedi.
Q. Qýanyshbaev atyndaǵy memlekettik akademııalyq qazaq drama teatrynda «Til tabysqandar» komedııasynyń tusaýkeseri ótpek. Rejısseri - QR eńbek sińirgen qaıratkeri B. Uzaqov. Qoıylym jelisi bylaısha órbıdi. Astana qalasynyń týǵan kúni qarsańynda kópten kórmegen baýyry Muqambetti izdep kelgen aýyldaǵy ápkesi Boldýqan kúlkili oqıǵaǵa tap bolady. Qoıylym kórermendi kúldire otyryp, búgingi qoǵamdaǵy ózekti máseleniń biri - tilimiz týraly oılatady.
B.Uzaqov 1994-97 jyldary T. Júrgenov atyndaǵy Óner akademııasynyń «Drama rejısseri» mamandyǵyn halyq artısi M. Baıserkenov pen Qazaqstannyń eńbek sińirgen qaıratkeri S Asylhanovtan bitirgen. 1997 jyly Astana qalasy Q.Qýanyshbaev atyndaǵy Memlekettik akademııalyq qazaq mýzykalyq drama teatryna arnaıy shaqyrýymen kelgen, sol ýaqyttan beri jıyrma ekige tarta qoıylymdy sahnalady.
Al M.Gorkıı atyndaǵy Memlekettik akademııalyq orys drama teatrynda «Torǵaıdyń uıasy» tragedııasynyń tusaýkeseri bolady. Qoıýshy-rejısseri QR Eńbek sińirgen ártisi Bekbolat Parmano, qoıýshy-sýretshisi -QR Mádenıet qaıratkeri Qanat Maqsutov, basty rólde - Svetlana Fortýna.
«Meniń erkindigim ózgeniń erkindigi bastalǵan jerde támam bolady». Bul Edıt Pıafpen uqsas betperdesiniń astaryna ózi ózinen jasyrynǵan spektakl keıipkeriniń sózi. Áıgili ánshiniń ómir tarıhy ózi úshin baspanaǵa aınalsa, Edıt Pıaf ómir súrýge kúsh beredi. Spektakl keıipkeri birtindep asyl oı ushyǵyn shyǵarady. Adamǵa ómir súrýge kúsh beretin - úmit pen senim. Spektaklde Edıt Pıaftyń mýzykasy men ánderi jandy daýysta oryndalady.
Sondaı-aq Astana qalasynyń Qýyrshaq teatrynda «Mereke» qoıylymynyń tusaýy kesiledi. Avtory - K.M.Ejembekov, rejısseri - K.H.Eshmuratova. Jyl on eki aı nyshandary merekelik shańyraq astyna bas qosyp, árqaısysynyń óziniń shyǵý tarıhy týraly syr shertedi. Ár keıipker sonymen birge túrli ulttardyń dástúrlerin tilge tıek etedi. Kishkentaı kórermender oıyn túrinde túrli elderdiń merekelik dástúrleri men ádet-ǵuryptarymen tanysady. Biregeı qoıylym ár eldiń mádenıetimen tanystyryp qana qoımaı, óz mádenıetine degen qurmet pen súıispenshilikti oıatýǵa baǵyttalǵan. Spektakl barysynda kishkentaı kórermender keıipkerlerge kómektesý arqyly ózderi de qoıylym qatysýshylary atanady.
