Astana kúni qarsańynda I halyqaralyq sıqyrshylar festıvali ótedi
ASTANA. QazAqparat - 5-6 shilde kúnderi Astana qalasynda I halyqaralyq «Magic Astana» - «Sıqyrly Astana» ıllıýzıonıster festıvali ótedi, dep habarlaıdy Astana qalasynyń 16 jyldyǵyna arnalǵan merekelik sharalardy daıyndaý jáne ótkizý jónindegi uıymdastyrý komıtetiniń medıa-shtaby.
Bul elimizde tuńǵysh ret qolǵa alynyp otyrǵan biregeı joba. Buryn-sońdy ótkizilmegen festıvaldi uıymdastyrýshylar endi jyl saıyn júzege asyrmaq. Elorda tórine álemniń túkpir-túkpirinen sıqyr óneriniń kásibı sańlaqtary keletin bolady. Eki kúndik shoý barysynda magııalyq ónerdiń maıyn ishken maıtalmandar Beıbitshilik jáne kelisim saraıynda jınalǵandarǵa eki kúndik shoý usynady.
Baǵdarlama keń aýqymdy. Kózdi ashyp-jumǵansha talaı qyzyqtyń kýási bolasyz. Óz isiniń sheberleri buryn-sońdy bolmaǵan keremetterdi kórsetýge ýáde etip otyr. Festıval qonaqtarynyń arasynda «otqa tússe janbaıtyn» aǵaıyndy Safronovtar bar. Olardyń analogy álemde joq. Eksklıýzıvti baǵdarlamalaryn ózderi daıyndaıdy. Olardyń aınalasynda Reseı, Japon, Amerıka memleketteriniń mamandary jumys isteıdi. 2012 jyly «Adamdy tirideı órteý» nómirlerimen eldiń záresin ushyrǵan. Tikeleı efırdegi órtten esin jııa almaı júrgender, kóz aldyndaǵy kisini kómip tastap nemese aramen bólshektep bólip tastaǵandaryn kórip jaǵalaryn ustaǵan. Bul ónerdi osy ýaqytqa deıin telearnadan nemese ǵalamtor betterinen kórip júrgen astanalyqtar endi tikeleı tamashalaı alady. Reseıdegi fokýs ónerimen aınalysatyn jalǵyz qyz Aleksandra Skachkova da tikeleı efır arqyly tanylǵandardyń biri. Fokýsnıkter men ıllıýzıonısterdiń «Ýdıvı menıa» telejobasynyń aqtyq synynda top jarǵan. Aleksandra zaldaǵy halyqpen tikeleı jumys istegendi unatady. Kórermen tyǵyz qarym-qatynas jasaı otyryp, qaıran qaldyrady. «Ýdıvı menıa» shoýynyń 3-maýsymdaǵy taǵy bir jeńimpazy Anton Abrashekov. Ol fokýsnık-manıpýlıator retinde ushqan qus, júgirgen ańdy qybyr etkizbeıdi. On jyldyq tájirıbesi bar taǵy bir talant elimizge qýana-qýana qadam basatynyn jetkizipti. «Ýdıvı menıa», «Ýlıchnaıa magııa» jobalarynyń qatysýshysy Aleksandr Mýrataev tórde otyrǵan qalyńdyqty toı ústinde tyǵyp qoıatyn ónerimen erekshelenedi.
On jylǵa jýyq ertegi álemine jetelep júrgen talantty artıs Pavel Karahtanov ta qur kelmeıdi. Kórermender bul óner ıesimen Reseı arnalary arqyly jaqsy tanys. Ár joly baǵdarlama júrgizýshileri onyń qımyl-áreketin operatorlardyń túsirip úlgere almaıtyndyqtaryn aıtyp, bas shaıqaǵan. «Fenomen», «Tańǵajaıyp adamdar» shoýynyń jeńimpazy, sondaı-aq «Ýkraınanyń birinshi fenomeni» atanǵan Artem Tıhevıch «Beıbitshilik jáne kelisim» saraıyn dúr silkindiretinine senimdi. Ol óz ónerin erekshe baǵalaıtyndardyń biri. Psıhologııalyq, magııalyq qasıetter men ishki túısigi arqyly jumys isteıdi. Máselen, bala kezinde Artem mýltfılm kórgisi kelse, ákesi tamashalap otyrǵan fýtbol arnasyn op-ońaı aýystyryp jiberetin kórinedi. Qyrǵyz eliniń joǵary sanatty sıqyrshysy, IBM múshesi, amerıkandyq SAM baýyrlastyq klýbynyń múshesi, Eýropada ótken «Bıtvy magov» jáne basqa baıqaýlardyń júldegeri Ildar ıAgofarovtyń qolyna túsken dúnıe sol sátte ǵaıyp bolady. Basqa bireýdiń qaltasynan tabylýy múmkin, ne aspanǵa ushyp joǵalady. Aýada qalyqtap, kúlge aınalady. Qyryq bólingen qaǵaz aqsha qaıta qalpyna keledi. Adamdar «ushyp», qasyq-shanyshqylar qol tıgizbeseńiz de ózderi qımyldap, aýzyńyzǵa as salady. Qysqasy, munyń bárin kórgen de, kórmegende armanda. Gollandyq ıllıýzıonısterdiń «Magic Unlimited» toby áriptesterin myń oraıtyn oılary bar. Quramynda kartashylar men joramal jasaýshylar, adamdyq keıipten shyǵyp basqa obrazǵa op-ońaı aınalyp ketetinder, joǵalyp-tabylatyndar, «ólip-tiriletinder» tolyp jatyr. Qoryta aıtqanda, asqaq Astananyń mereıli kúnderi «Magic Astana»-«Sıqyrly Astana» ıllıýzıonıster festıvali esten ketpes estelikter qaldyrmaq.
