Astana kúni qarsańynda elordalyqtar qazaqtyń dástúrli án ónerin tamashalaıdy
ASTANA. 14 maýsym. QazAqparat - Elordanyń 15 jyldyǵyn merekeleý qarsańynda, 4 shildede Kongress holl saraıynda dástúrli ánshilerdiń qatysýymen «Astanaǵa tartý» kontserti ótedi. Bul týraly astana.kz saıtyna Astananyń 15 jyldyq merekesin ázirleý jáne ótkizý jónindegi uıymdastyrý komıteti shtabynyń Medıatoby málim etti.
Qazaqstan - talant pen ónerge baı ólke. Halqymyzdyń ǵasyrlardan kele jatqan mádenı baı murasy - táýelsizdiktiń arqasynda odan ári órkendep, damı túsýde. «Astanaǵa tartý» kontserti elorda turǵyndary boıynda ulttyq rýhty jandandyryp, qazaq halqynyń baǵa jetpes mádenı murasynan sýsyndatýdy maqsat tutady.
Baǵzy zamannan qazaq on saýsaǵynan óner tamǵan daryndy halyq. Kez kelgen toı-domalaq, kóńildi ortalar án-jyrsyz, kúmbirlegen kúısiz ótpegen. Bir sheti men bir shetine ushqan qustyń qanaty talatyn ulan-baıtaq dalamyz bar. Respýblıkanyń ár túkpiri ózindik ereksheligimen dara, ár óńirdiń ózine tán dástúrli oryndaýshylyq óneri de qalyptasqan. Qazirgi tańda dástúrli ánderdi oryndaýdyń túrli úlgileri bar. Ol Arqa, Syr óńiri, Jetisý, Shyǵys (Altaı-tarbaǵataı) jáne Batys oryndaýshylyq dástúrleri.
Qala kúni qarsańynda dástúrli oryndaýshylar elorda turǵyndary men qonaqtaryna dástúrli qazaq mýzykasynyń keremet keshin syılaýǵa ýáde berýde.
Kontserttik baǵdarlamada Qaraqat Ábildına, Aıgúl Qosanova, Klara Tólenbaeva, Bekbolat Tileýhan, Ramazan Stamǵazıev, Gúlmıra Sarına, Erkin Shúkimanov, Elmıra Jańabergenova men Ardaq Isataeva óner kórsetedi.
