Astana kúni qarsańynda elordada ІІ Batpyraýyqtar festıvali ótedi
ASTANA. QazAqparat - Elorda kúni aıasynda Astanada 4-6 shilde kúnderi saǵat 12.00-de ІІ Halyqaralyq «Astana Aspany» batpyraýyqtar men áýe sharlary festıvali ótedi, dep habarlaıdy ákimdiktiń resmı saıty.
Festıvalǵa Ispanııa, Sıngapýr, Germanııa, Reseı jáne Avstrııa elderiniń dızaınerleri qatysady. Astanaǵa Prokite (Reseı), Rolf Tsımmermann (Rolf Zimmermann) (Germanııa), Anna Rýbın (Anna Rubin) (Avtrııa), ıspandyq Pedro Gonsalestiń (Pedro González) ókildigimen Los Hermanos Show Kites (Ispanııa) komandalary keledi. Bıylǵy festıvaldiń ereksheligi - ol úsh kúnge jalǵasady.
Astanadaǵy merekelik is-sharalardyń resmı saıtynyń habarlaýynsha, balalar men eresekterge arnalǵan sheberlik saǵattary uıymdastyrlyp, tájirıbeli sheberler batpyraýyqty qoldan jasaýdy úıretedi.
Astana qalasy Mádenıet basqarmasynyń habarlaýynsha, festıval aýmaǵy sektsııalarǵa bólinedi. Kire beriste shatyrlar tigilgen demalys aýmaǵy ornalasady, ekinshi aýmaqta mýzykanttar men dıdjeıler óner kórsetetin sahna qoıylady. Kelýshilerge demalý úshin arnaıy laýndj sektsııa usynylady. Kásibı mamandar eń úlken jáne dızaınerlik batpyraýyqtardy arnaıy qorshalǵan aýmaqtarda ushyratyn bolady.
Qala turǵyndary men qonaqtary batpyraýyqtardy satyp alyp, ortaq alańda ushyra alady.
Eske sala keteıik, «Astana Aspany» batpyraýyqtar festıvali alǵash ret 2014 jyly 5 shildede ótken bolatyn.
