Astana kúni aıasynda elordada qazaq tildegi «Báıterek» mýltfılminiń tusaýy kesildi

«Báıterek» mýltıplıkatsııalyq fılmi - joba avtorlarynyń Qazaqstan Táýelsizdiginiń 20 jyldyǵyna jáne Astana kúni merekesine tartýy. Fılmniń tusaýkeserine múmkindigi shekteýli balalar jáne olardyń ata-analary shaqyryldy. Kórsetilim bastalmas buryn baldyrǵandar mýltfılmniń keıipkerleri - Qaısar atty balamen jáne Jalmaýyz kempirmen kezdesti.

«Báıterek» - bul jas kórermenderge arnalǵan shytyrman oqıǵaǵa toly anımatsııalyq fılm. Fılmniń negizgi arqaýy retinde «Báıterek» monýmenti alynǵan. Mýltfılmde astanalyqtardyń ómiri sýretteledi jáne arý qalamyzdaǵy mańyzdy nysandar: «Pıramıda» (Beıbitshilik jáne kelisim saraıy), «Ushqysh tárelke» (Tsırk ǵımaraty), «Han Shatyr» syndy ǵımarattar kórinis tapqan. Sıýjet jelisi boıynsha - qaskóıler Táýelsizdik kúni merekesiniń shyrqyn buzbaq nıette tynyshtyq pen berekeniń negizi bolǵan - «Báıterek» ómir aǵashyndaǵy ǵajaıyp Samuryq qusynyń kún tárizdi altyn jumyrtqasyn urlap, sol arqyly álemge astan-kesten ornatpaq bolady. Biraq fılm sońynda ádettegideı jaqsylyq jamandyqty jeńedi.

Anımatsııalyq fılmdi túsirý ıdeıasy prodıýser Ábdiqadyr Sabyr men onyń uly Nursultan Sabyrǵa tıesili. Joba avtory - Erlan Áben. Mýltfılm «Astana-Kompleks» Korporatsııasy» JShS janyndaǵy «Báıterek» kınostýdııasynda jasaldy jáne onyń uzaqtyǵy - 15 mınýt. Qazaq tilinde jaryq kórgen mýltfılm orys tilinde sýbtıtrmen beriledi. Avtorlar jýyrda mýltfılmniń kelesi serııasyn túsirýge kirispek.

«Báıterek» mýltfılmin 6 shildege deıin kúnde «Kınopark» kınoteatrlar jelisinen kórýge bolady.