Astana kúni aıasynda Alash arystaryna taǵzym etildi
ASTANA. QazAqparat - Búgin Astanadaǵy Jastar saraıynda Astana kúnin merekeleý aıasynda Turar Rysqulov, Sultanbek Qojanov, Sáken Seıfýllın, Beıimbet Maılın, Іlııas Jansúgirovterdiń týǵanyna 120 jyl toolýyna oraı «Astanadan taǵzym» atty ádebı-sazdy kesh ótti.
«Keshtiń maqsaty - ulttyq rýhanııatymyzdyń ózegi, memlekettik tildiń mártebesi men mańyzyn halyq arasyna keńinen nasıhattaý, uly tulǵalardyń beıneleri arqyly jastardyń ultjandylyq sezimin oıatý, elin, jerin, týǵan tilin súıý - Otan aldyndaǵy qasıetti boryshtary ekendigin uǵyndyrý», - dep atap ótti Astana qalalyq Tilderdi damytý basqarmasynyń basshysy Erbol Tileshov.
Keshte joǵaryda atalǵan bes arys týraly beınesıýjet arqyly málimetter berilip, aıtysker aqyn Amanjol Áltaevtyń arnaýymen ashyldy. Serik Ospanov, Sáken Maıǵazıev, Ardaq Balajanova, Lena Ábdihalyqova jáne taǵy basqa ánshiler Alash qaıratkerleriniń óleńderine jazylǵan ánderdi oryndady. Sonymen qatar, Q. Qýanyshbaev atyndaǵy memlekettik akademııalyq qazaq mýzykalyq drama teatry ártisteriniń qatysýymen sahnalandyrylǵan kórinister qoıyldy.
