Astana kúni: Atyraý oblysynyń aýdanynda ótken kontsertke 5 myń kórermen jınaldy

ASTANA. QazAqparat - 5 shilde kúni Mahambet aýdanynyń Mahambet aýylynda Astana kúni merekesi keń aýqymda atalyp ótti. Aýdandyq ákimdik kórermender úshin arnaıy qazaq estradasynyń jaryq juldyzdary - «Muzart» tobyn shaqyrtqan, dep habarlaıdy «QazAqparat» HAA tilshisi Atyraý oblysynyń aımaqtyq kommýnıkatsııalar qyzmetine silteme jasap.

Aýdan ortalyǵynyń basty alańyna súıikti ánshilerin tyńdaýǵa 5 myńnan astam kórermen jınaldy. Aıta keterligi, Mahambet aýylyna osy kontsert úshin tek aýdan emes, qalalardan da tyńdarmandar kelgen. Ánshilerdiń ónerinen bólek, balalar úshin átkenshekter men batýttar qurylyp, buqara halyqtyń kóńilin kóterý sharalary uıymdastyryldy.

«Bizdi osylaı quttyqtap jatqanyna, keń aýqymdaǵy sharalardyń uıymdastyrylyp otyrǵanyna óte qýanyshtymyn. Sońǵy jyldary Tamara Asar, Beıbit Qorǵan, Roza Rymbaeva jáne Maqpal Júnisova syndy ánshiler aýylymyzǵa kelip ketken. Endi mine, «Muzart» keldi. Naǵyz ánshilerdiń kelip óner kórsetip jatqany biz úshin óte úlken jańalyq», - deıdi Mahambet aýdanynyń turǵyny Áıgerim Sársekeeva.

Kontsert barysynda Mahambet aýdanynyń eńbek ardagerleri alǵys hattarmen jáne baǵaly syılyqtarmen marapattaldy.

«Aýyldyń gúldenýi men halyqtyń mádenı ómirin shyńdaýda Memleket basshysynyń tapsyrmasyna ıek artamyz. Ár aı saıyn qazaq estradasyna tanymal juldyzdardyń qatysýymen kontsert uıymdastyryp, áleýmettik mańyzy bar ınfraqurylymdyq jobalardy júzege asyryp kelemiz. Belsendi turǵyndar men oblys ákimdiginiń qoldaýy zor. Buǵan qosa ár apta saıyn EKSPO-2017 kórmesine arnalǵan kontsertterdi ótkizip, arnaıy oıyn arqyly turǵyndarǵa atalǵan kórmeniń bıletin tabystaımyz», - deıdi Mahambet aýdanynyń ákimi Alımuhamed Quttymuratuly.