Astana kúni 40-tan astam alańda mádenı sharalar ótedi
ASTANA. QazAqparat - Astana kúni 40-tan astam alańda mádenı sharalar ótedi. Bul týraly «BNews.kz» AA stýdııasyndaǵy onlaın konferentsııa barysynda elorda ákiminiń orynbasary Ermek Amanshaev aıtty, dep habarlady astana.gov.kz.
«Qaladaǵy barlyq alańdar, turǵyndardyń súıikti oryndaryna aınalǵan saıabaqtar men gúlzarlarda 40-tan astam mádenı, sporttyq baǵdarlamalar uıymdastyrylady. Kórmeler men kontsertter ǵana emes, halyqtyq serýender de ótedi. Bıylǵy jyly mádenıet jáne demalys saıabaǵynda erekshe baǵdarlama qoıylady», - deıdi E.Amanshaev.
Onyń aıtýynsha, jastarǵa arnalǵan alańdarda ınteraktıvti oıyndar, festıvaldar ótedi.
«Sporttyq bıge, velojarysqa qyzyǵatyn adamdarǵa arnalǵan is-sharalar da nazardan tys qalmaıdy. Túrli sporttyq oıyndar 28 maýsym kúni velojarystan bastalady. Oǵan 1000 jýyq adam qatysady dep kútilýde. Sportshylar «Saltanat Saraıynan» «Astana Arenaǵa» deıin júrip ótedi», - dep tolyqtyrdy ákimniń orynbasary.
Sonymen qatar, «Alaý» sport kesheninde ústel tennısinen jarys ótedi. Bir ýaqytta 1000 jýyq adam oınaıdy dep josparlanýda.
«Sondaı-aq, elordalyqtar qala boıynsha kitap kórmeleri men poezııa keshterine qatysady», - dep tolyqtyrdy ol.
