Astana kúni: elordanyń alty aýdanynda juldyzdar óner kórsetip jatyr
ASTANA. KAZINFORM — Búgin Astana kúnine oraı elordanyń barlyq alty aýdanyndaǵy turǵyn alaptarda qazaqstandyq estrada juldyzdary men shyǵarmashylyq ujymdardyń qatysýymen merekelik kontsertter ótip jatyr, dep habarlaıdy qala ákimdiginiń resmı saıty.
Merekelik baǵdarlamalar saǵat 11:00, 12:00 jáne 14:00–de bastalyp, qalanyń ondaǵan alańynda uıymdastyrylyp jatyr.
Baıqońyr aýdany
Saǵat 11:00–den bastap Óndiris jáne Kirpishti turǵyn alaptarynda merekelik kontsertter ótip jatyr. Kontsert bastalar aldynda turǵyndar men kishkentaı búldirshinder úshin anımatorlardyń qatysýymen oıyn-saýyq baǵdarlamasy uıymdastyryldy.
Sahnada Aıgúl Imanbaeva, Dosymjan Tańatarov, Gúlnur Orazymbetova, «Órken» trıosy jáne ózge de ónerpazdar óner kórsetedi.
Esil aýdany
Merekelik is-sharalar Prıgorodnyı, Baǵystan turǵyn alaptarynda jáne «Orman park» turǵyn úı kesheninde ótip jatyr. Prıgorodnyı men «Orman park» turǵyn úı keshenindegi kontsertter saǵat 11:00–de bastalsa, Baǵystandaǵy merekelik baǵdarlama saǵat 14:00–de bastalady.
Balalar men otbasylarǵa anımatorlardyń qatysýymen oıyn-saýyq baǵdarlamasy ázirlengen. Kórermender aldynda Luqpan Joldasov, Merýert Baqyt, DOS toby, Nurlan men Murat dýeti, Qurmash Mahan jáne basqa da ánshiler óner kórsetedi.
Nura aýdany
Saǵat 11:00–de Úrker turǵyn alabyndaǵy «Aıǵyrjal» saıabaǵynda merekelik kontsert bastaldy. Al saǵat 14:00–de merekelik baǵdarlama «Jaǵalaý» saıabaǵynda jalǵasady.
Turǵyndar men qonaqtar úshin «Astana» toby, Aıdyn Jumabaı, «Tomırıs» trıosy, Madı Qadyrov jáne basqa da ónerpazdar óner kórsetedi.
Saryarqa aýdany
Saǵat 11:00–den bastap Kóktal turǵyn alabyndaǵy «Qorǵaljyn» saıabaǵynda Astana kúnine arnalǵan merekelik kontsert ótýde.
Kontserttik baǵdarlamamen qatar turǵyndar men qonaqtarǵa ulttyq sport túrlerinen jarystar uıymdastyrylǵan. Oǵan kez kelgen adam qatysa alady, al jeńimpazdarǵa baǵaly syılyqtar tabystalady.
Sahnada Nurlan men Murat dýeti, Aıdyn Jumabaı, «Astana» toby jáne basqa da oryndaýshylar óner kórsetýde.
Saraıshyq aýdany
Merekelik kontsertter aýdannyń eki alańynda uıymdastyryldy. Ónerkásip turǵyn alabyndaǵy is-sharalar saǵat 12:00–de bastalsa, «Otaý» shaǵynaýdanyndaǵy kontsert saǵat 14:00–de bastalady.
Kórermender aldynda Aıgúl Imanbaeva, Medet Shaıkelov, Berik Erjanov, QAZAQ VOICE toby jáne ózge de ónerpazdar óner kórsetedi.
Almaty aýdany
Saǵat 14:00–de Temirjolshylar turǵyn alabynda jáne «Jeruıyq» saıabaǵynda merekelik kontserttik baǵdarlamalar bastalady.
Aýdan turǵyndary men qonaqtary úshin Asan Ábdiraldın, Turar Tóleýtaı, Allajar Qaıbar, Erkebulan men Baýyrjan dýeti, sondaı-aq qazaqstandyq estradanyń basqa da ónerpazdary óner kórsetedi.
Buǵan deıin Aqordanyń baspasóz qyzmeti Memleket basshysy Qasym-Jomart Toqaevtyń Astana kúnine arnalǵan quttyqtaýyn jarııalady.
