Astana qumyrsqa ıleýine aınalyp bara jatqan joq pa — vıtse-mınıstr jaýaby

ASTANA. KAZINFORM — Ónerkásip jáne qurylys mınıstriniń orynbasary Oljas Saparbekov Astanadaǵy turǵyn úı alaptary qumyrsqa ıleýine aınalyp ketkeni týraly syndarǵa jaýap berdi. 

— Búkil úıler bekitilgen talaptar boıynsha salynyp jatyr. Basqa elderde adamdar qalaı turyp jatqanyn salystyryp qarasańyzdar jetip jatyr. Shyn máninde biz múlde qumyrsqa ıleýindegideı uılyǵysyp turyp jatqan joqpyz, — dedi vıtse-mınıstr.

Sondaı-aq, ol baspana baǵasyn suranys anyqtaıtynyn eske saldy.

— Baǵa qoljetimdi me? Bul rıtorıkalyq suraq. Suranys bolsa, usynys ta bolady. Baspana satyp alýǵa bolady. Baspana degen baryp satyp ala salatyn taýar emes ekenin túsiný kerek. Biz de baspana alý úshin aqsha jınaǵanbyz. Bizde baǵa, sapa, bólme sany boıynsha, ornalasqan aýdany boıynsha tańdaý bar, — dedi Oljas Saparbekov.

Buǵan deıin Shymkentte ıpotekasyn tóleı almaǵan kópbalaly otbasy baspanasyz qala jazdaǵanyn jazǵan edik.