Astana kýbogy: Sportshylar Denıs Tendi eske aldy
ASTANA. QazAqparat - Elordanyń ortalyq parkinde ótken rolıkti shańǵydan Astana kýbogy sarapqa salynǵan VI saıys belgili mánerlep syrǵanaýshy Denıs Tendi eske alý sharasynan bastaldy. Oǵan Qazaqstan men Reseıden 150-ge tarta kásibı sportshylar qatysty. Bul jóninde «QazAqparat» HAA OO «QR shańǵy jarysy ulttyq federatsııasy» baspasóz qyzmetine silteme jasap habarlaıdy.
Denıs Tendi eske alý sharasynda federatsııanyń birinshi vıtse-prezıdenti Nıkıta Devıatkın shańǵyshylar Denısti talantty, elimiz ben sportty sheksiz súıetin azamat retinde jaqsy biletinin jetkizdi.
«Onyń ómirden erte ketkeni qabyrǵamyzdy qaıystyrdy. Ol tek daryndy mánerlep syrǵanaý sheberi ǵana bolǵan joq, ol qysqy sport túrleriniń elshisi retinde qurmet tórinen kórindi», - dedi ol.
Denısti eske túsirip qana qoımaı, báseke barysynda sportshylar baǵyndyrǵan jeńisterin ómirden erte ótken dańqty sportshynyń qurmetine arnaıtynyn aıtyp ótti.
Ústimizdegi jyly rolıkti shańǵydan Astana kýbogy altynshy márte ótkizilip otyr. Bıyldan bastap báseke halyqaralyq deńgeıge kóterildi. Jigitter men qyzdar arasyndaǵy alǵashqy saıys belsendi FIS-kody bar kásibı saıyskerler arasynda boldy.
Shańǵy sportynan ulttyq quramanyń bas menedjeri Aleksandr Batıaıkın «Biz dál osy jerde, Qazaqstanda joǵary deńgeıdegi osyndaı jarys ótkizýge múmkindik týǵanyna qýanyshtymyz. Astana kýbogyn uıymdastyrýshylar bıyl bul baǵytta aýqymdy jumystardy atqardy. Sondaı-aq, shańǵymen jarys federatsııasymen áriptestik baılanys ornatyp, demeýshilik kórsetip júrgen basty áriptesimiz - «Samuryq-Qazyna» AQ, áleýmettik áriptesimiz - «Samruk-Kazyna Trust», Astana qalasy mádenıet jáne sport basqarmasy, Ulttyq Olımpıada komıteti, «Dıona» dúkender jelisi, «Pol Berrı» dúkeni, «Ski Club Astana» kompanııasy jáne ózge de áriptesterimizge rızashylyǵymyzdy bildiremiz», - dedi.
Halyqaralyq saıys barysynda jigitter arasynda joǵary jetistikke Qazaqstannyń 44 aldyńǵy qatarly shańǵyshylary arasynan Vıtalıı Pýhkalo kóterildi. Ekinshi oryn Konstantın Bortsovqa buıyrsa, úshinshi orynǵa Oljas Klımın ıe boldy. Qyzdar arasynda Valerııa Tıýlenevaǵa eshkim teń kelmese, odan keıingi oryndardy Ksenııa Shalygına men Elmıra Mýtagarova ózara bólisti. Sondaı-aq, jigitter arasyndaǵy básekege belgili shańǵyshy, Qazaqstannyń Paralımpıadalyq quramasynyń múshesi Alekseı Gerlıts qatysty. Ol ulttyq qurama múshelerimen qatarlas oıyn kórsetti.
Sodan keıin áýesqoılar men ardagerler arasyndaǵy báseke bastalyp ketti. Bul saıystaǵy eń egde qatysýshy Anatolıı Daragan boldy. Shýchınsk qalasynyń 83-jastaǵy turǵyny federatsııa tarapynan ótkiziletin ashyq saıystarǵa turaqty túrde qatysyp keledi.
«Bizder, ulttyq qurama bapkerleri men sportshylar Astana kýbogy arqyly aldymen jazǵy mezgildegi daıyndyq deńgeıimizdi baǵamdaıtyn bolamyz. Biz atalmysh jarysty altynshy jyl qatarynan ótkizýdi dástúrge aınaldyryp úlgerdik. Bul qatelikterimizdi tarazylap, bapkerlik qyzemttegi josparlarymyzdy naqtylaýǵa múmkindik jasaıdy. Sondaı-aq, jańadan tájirıbe jınap júrgen jastardyń deńgeıine nazar aýdaramyz. Bul bizge úlken múmkindikterge jol ashady», - deıdi QR eńbek sińirgen sheberi Nıkolaı Chebotko.
