Astana-Qostanaı jolynyń boıyna qar ustaıtyn qorshaýlar ornatylýda
QOSTANAI. QazAqparat - Qostanaıda respýblıkalyq mańyzǵa ıe tas joldardyń boıyna qar ustaıtyn qorshaýlar ornatylyp jatyr, dep habarlaıdy «QazAqparat» HAA tilshisi «QazAvtoJol» AQ oblystyq fılıalyna silteme jasap.
Atalǵan mekemeniń qozǵalys qaýipsizdigi bóliminiń bastyǵy Aıdar Hasanovtyń aıtýynsha, joldardyń qar alyp qalatyn bólikterine beton qalqanshalar qoıylyp jatyr.
«Bizdiń fılıal oblystaǵy respýblıkalyq mańyzǵa ıe joldarǵa jaýap beredi. Búginde Qostanaı-Áýlıekól-Surǵan aralyǵyndaǵy tas joldarǵa qorshaý qoıylýda. Jalpy, qar kóp alady degen uzyndyǵy 60 shaqyrym aýmaqtyń 10 shaqyrymy qamtylady», - dedi Hasanov.
Bólim bastyǵynyń sózinshe, osyǵan deıin bul aralyqtarda aǵash qorshaýlar turǵan. Qatty jeldiń kesirinen olar kópke shydamaǵan syńaıly. Sol sebepti qorshaýlar betonnan turǵyzylmaq. Osyǵan oraı respýblıkalyq bıýdjetten 211 mln teńge bólindi. Barlyq jumystar aqpan aıynda aıaqtalady.
Foto: kstnews.kz
