«Astana-Qostanaı» tasjolynda Toyota Alphard júrgizýshisi esirtki shegip alyp, jolaýshy tasymaldaǵan

ASTANA. KAZINFORM — Elordadan Qostanaıǵa jolaýshy apara jatqan júrgizýshi saparǵa shyqpas buryn esirtki qoldanǵan. Bul týraly polisia.kz saıty jazady. 

Bes jolaýshysy bar Toyota Alphard markaly avtokólikti tártip saqshylary «Jaqsy — Esil-Buzylyq» avtojolynda toqtatqan. Ol mobıldi qosymshany paıdalana otyryp, elordadan Qostanaıǵa jolaýshylardy jeke tasymaldaýmen zańsyz aınalysqany anyqtaldy.

Quqyq buzýshy kezekti reısin jasar aldynda marıhýana esirtkisin paıdalanǵan. Osylaısha ol bes jolaýshynyń ómirine qaýip tóndirgen. 

Tártip buzýshyǵa qatysty polıtsııa qyzmetkerleri tıisti ákimshilik hattamalar toltyrdy. Taksı júrgizýshisi 15 táýlik merzimge qamaýǵa alynyp, kólik quralyn basqarý quqyǵynan 7 jylǵa aıyrylýy múmkin. Sonymen qatar, jolaýshylardy zańsyz tasymaldaǵany úshin oǵan 30 AEK kóleminde aıyppul salynady.

Polıtseıler jolaýshylardy jaqyn mańdaǵy temirjol vokzalyna jetkizdi.